Sfuei Mensîl Furlan Indipendent
Archivi de Patrie

MUSIS DI…FACEBOOK. Esclamazions furlanis… di sucès

............

La Patrie dal Friûl e je aromai passe un an che e à inviade la sô pagjine Facebook. Un imprest par  incuintrâ e dialogâ cui letôrs e cu la int che e frecuente il social network. E cussì al capite di incuintrâ cualchi realtât interessante…
Une pagjine cun passe 17.000 adesions e inzornade no masse dispès, ma che di resint e à tornât a dâ segnâi di vite. Lin a scuvierzi cui che al è daûr de pagjine “Esclamazioni in friulano”.
–––
Mandi aministradôr, cui sêstu, di dulà sêstu, ce fâstu te vite?
O soi Andrea De Luca e o vîf a Flumignan; o ai vincjetrê agns e te vite o fâs l’operari intune industrie tessile.
–––
Cemût ise nassude la pagjine? O vin viodût ator par Facebook che a son tantis  pagjinis che si intitulin “Esclamazioni in…” cun dopo varis dialets: ti sêstu ispirât a une di chês? Cuale ise la storie de tô pagjine e in trop timp âstu tirât sù passe 17.000 adesions?
Il sfuei mi è stât “consegnât” di un zovin che nol veve timp par stâi dâur e, midiant di une sô valutazion, tra tancj al à sielzût me. Cuant che mi à passade la pagjine, e veve 11.000 iscrits e cun cualchi modificazion e rinovament o ai scomençât subit a vê un aument di “like”. Dopo cirche un an di lavôr, ancje jo le ai passade dantle a un gno amì, ma viodint che je stade ferme pui di doi agns, o ai decidût di tornâ a cjapâle jo, ancje se no ai tant timp. Ma alc al è alc…
–––
Dulà cjatistu lis “esclamazions” e il materiâl pe pagjine?
Lis esclamazions lis cjati tai gjornâi, lunaris, diaris e detulis de int. O copii cence stâ tant a controlâ, ancje se ogni tant i letôrs a son pignûi sui acents o su cualchi letare.
–––
Cualis sono lis robis che a àn vût plui sucès?
Par vuadagnâ “like”, chel che al funzione miôr al è meti fotografiis dal Friûl, forsit parcè che la int si ricognòs in chestis fotos.
–––
A part la tô, cualis sono lis miôr pagjinis/profîi dai furlans su Facebook?
Il sfuei che o preferìs al è Udine20, par savê fiestis o avigniments.
–––
Tu tu dopris il furlan, ancje se cualchi volte cun cualchi falope: ti ise mai vignude voie, doprantlu su Facebook, di imparâ a scrivilu miôr?
Disint la veretât, mi plasarès imparâ a scrivilu e a leilu miôr, però e varès la scuele di impegnâsi a fâlu imparâ ai fruts.
–––
Daûr de tô esperience, il furlan funzionial ancje su internet? E internet, puedial judâ il furlan?
Par me internet al pues judâ il furlan parcè che al à bisugne di jessi “sintût” ancje di chel che, par motîfs varis, nol è pui in Friûl, ma ben al à voie di sintîlu o di fevelâlu come che tancj a fasin tal gno sfuei, che a scrivin de France, Gjermanie, e v.i. Chest al è il gno obietîf. ❚
Dree Venier

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +