Sfuei Mensîl Furlan Indipendent
Archivi de Patrie

Macroregjons, une oportunitât di racuei

Alessandro Ambrosino - Graduate Institute, Gjinevre

Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl

Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une iniziative nassude “dal bas”: lis strategjiis macroregjonâls. Di fat, lis “macroregjons” a son cuadris politics fats sù principalmentri di guviers regjonâi che a condividin problemis e potenziâi comuns. Un esempli pratic al ven de macroregjon dal mâr Baltic, la prime a jessi stade istituide tal 2009. L’incuinament de aghe al è stât la suste che e à sburtât lis regjons ator dal mâr a metisi adun par cjatâ une soluzion comune. Dopo, i aministradôrs a àn presentât il plan a Bruxelles e, cul jutori dai europarlamentârs de aree, lu àn disvilupât e formalizât intune macroregjon. Cussì, la UE e à inserît la politiche macroregjonâl inte suaze de politiche di coesion. Plui o mancul lant daûr di cheste traietorie, altris regjons ator de Europe a àn fat compagn e a son nassudis la macroregjon dal Danau tal 2011, la macroregjon Adriatiche-Joniche tal 2014 e la macroregjon Alpine tal 2015. Il model al è simpri chel: un “pat” cun Bruxelles che al dîs no budgets ad hoc, no finanziaments – ven a stâi che si fâs dut cui bêçs a disposizion des regjons – e no struturis gnovis tant che segretariâts dedicâts.
◆ In dut chest, il Friûl al conferme la sô vocazion di “cûr de Europe” e al è cjapât dentri su doi plans. Di une bande cun EUSAIR, la macroregjon adriatiche, e di chê altre cun EUSALP, la macroregjon Alpine. La prime e coinvolç dutis lis regjons adriatichis, chês balcanichis e chês talianis fintremai te Pulie, cun di plui Basilicade, Calabrie e Sicilie. I obietîfs e son la pescje, la tutele dal mâr e i traspuarts. La seconde, invezit, e je une vere fuarce di impat in Europe: 48 regjons alpinis de France ae Slovenie, 80 milions di abitants e 3 mil miliarts di PIL anuâl. Chê e je cence dubi la plui omogjenie in tiermins di ricjece e di benstâ. Però e à ancje problemis articolâts tant che lis disparitâts teritoriâls jenfri citâts e valadis. La macroregjon danubiane e tache juste dongje, in Slovenie. Cheste posizion incrosade e je pardabon uniche, e poche le vocazion europeane dal Friûl, e e meretarès une riflession profonde. Ma il dubi che a Triest dut chest al sedi sù par jù discognossût al è fuart, soredut confrontant la sumiere di cheste zonte cul dinamisim di Illy o ancjemò prime cu la Comunitât di Lavôr “Alpe-Adria”. ❚

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +