Ma cuant decidìno di sveâsi?

Isal finalmentri rivât il moment di cambiâ? Il biel esperiment dal Laboratori di Autonomie al à mostrât tai mês indaûr une gnove maniere di cjalâ al Friûl di bande dai siei aministratôrs. A tancj ur è tornât iniments il timp – za fa tancj agns – cuant che il Moviment Friûl e ancje altris fuarcis a tiravin il cjaruç de identitât furlane viers obietîfs une vore ambiziôs: la Universitât e la ricostruzion, par esempli. Ma vuê ce obietîf vino?
Intun mont e intune Europe che a stan mudant la lor muse a la svelte, il nestri popul al à scomençât a rifleti di gnûf su di se: e chest al è za un biel segnâl. Ocjo a no fermâsi achì, dut câs: parcè che se il mont globalizât nus fâs masse pôre, se o vin masse timidece tal sielzi i nestris obietîfs e salvâ la nestre autonomie, o sin dal gjat! E alore, e je bisugne di movisi! E di corse, lâ a stiçâ un cambiament in miôr dal asset locâl. Covente tornâ parons di dut ce che nus reste in tiermins economics, a partî dai bens come la aghe, che in teritoris come la Carinzie o il Trentin no vegnin straçâts ma anzit sparagnâts come tesaurs pal avignî. E bisugne ancje no butâ vie plui parts dal nestri teritori: e partî de tiere par tornâ a meti in vore une economie di prossimitât che e fasi capî ce direzion che al à di vê il nestri popul tal gnûf milenari. O vin di discuvierzi un mont gnûf, che ancjemò no cognossin e che salacor no calcolìn ancjemò come pussibil. Ma daspò de Prime Vuere Mondiâl, e po de seconde, e po dopo dal taramot, ce vino fat? O vin simpri imagjinât un Friûl diferent, che al les a cressi: cumò forsit la cressite no je plui l’unic parametri di tignî cont. La cualitât dal vivi si po creâ cu la realizazion di progjets dal bas, magari ancje in rêt, ma si scuen pensâ a un sisteme che al vedi une continuitât reâl, une logjiche alternative a chel disboscament produtîf che nus sta fasint deventâ ducj plui puars. E se par Latterie Friulane la disgracie e je vignude di fûr, pe CoopCa i cjargnei si son fats mâl soredut di bessôi.
De schirie di cunvignis inmaneadis dal grup di sindics che al à domandât di fâ alc di sest pal Friûl di doman, o vin podût preseâ che alc al è daûr a mudâ, a svoltâ, a cressi e a vierzi une prospetive divierse pal avignî. Ma bisugne cjatâ daurman un troi di inovazion che nus rindi efetivamentri speciâi: se la gnove Assemblee des Comunitâts Linguisticis di minorance previodude de riforme dai ents locâi e jentrarà in vore pardabon, al sarà chel il puest dulà che chestis ideis a varan di cjapâ forme. Ma al sarès un pecjât se la esperience dal Laboratori e ves di esaurîsi culì. Ancje se no somee ancjemò masse clare la direzion dal cambiament che si à voie di sburtâ, la compagnie che e à metût adun chescj incuintris e je in chest moment l’unic seri tentatîf di no pleâsi al pinsîr dominant des bancjis e de tecnocrazie che a vuelin indreçâ ogni aspiet de vite publiche in Europe.
Tornâ a creâ spazis identitaris dulà meti in cantîr gnûfs modei di disvilup al è ancje il mût plui dret e sclet par fâ cressi e selezionâ une gnove classe dirigjente. E e je ancje la clâf par tornâ a dâ dignitât e fuarce ancje ae tutele de lenghe che cumò, magari cussì no, e je lassade ae buine volontât dai singui e no je sintude inte comunitât furlane come un dovê previodût di une leç dal Stât vincolante par ducj. Bisugne vê la fuarce di recuperâ il spirt che tal 1996 al à puartât ae aprovazion de Leç 15 su la tutele dal furlan: salvâ i valôrs che nus zontin e çoncjâ di plante fûr lis barufis. In chê volte o vin imbastide une buine planificazion linguistiche che (par cumò) e à salvât il furlan. Cumò nus tocje pensâ a une planificazion economiche, urbanistiche, sociâl e culturâl che e salvi il Friûl. Sarìno bogns di rivâ adore a fâlu? ❚
Walter Tomada