“Ljuba Toast Cricket Club” e lis storiis de band furlane simpri in vacance a Dresde

«O volevin meti dongje un disc cun tocs che a contassin di plui lis nestris storiis, une divierse di chê altre, e meti dongje de musicalitât blues di “No covente rabiâsi” altris suns».
Al è cussì che “Aldo Sbadiglio e la Famiglia Ananas in vacanza a Dresda”, il grup di legris musiciscj vincidôrs dal Premi Friûl 2013, nus conte cemût che al à pensât al gnûf disc, jessût a Setembar dal an passât cun la etichete di Musiche Furlane Fuarte: “Ljuba Toast Cricket Club”.
Dopo i concierts organizâts in diviersis localitâts dal Friûl e fûr Regjon come “Musiche di Sconfine” e “Art tal ort”, i musiciscj matarans a son za pronts par jessî cun altris tocs che come simpri a metint in sene tantis storiis.
L’ALBUM_«Il titul dal album “Ljuba Toast Cricket Club”, al è un disberdelenghe come il non dal grup,  lu vin sielt parcè che ti reste di sigûr tal cjâf. Lis cjançons no àn confins e soredut a tabain dal nestri teritori».
Ducj i tocs a son nassûts in mût casuâl e ognidun al conte alc. Tacant dal prin toc, cui glaçûi tal supermarcjât, fin a partî par un viaç cun Aldo tal Friûl des diversitâts culturâi, lant a finîle a Milan e Udin, dulà che e regne violence e casse integrazion. E daspò Fabian Riz, guru spirituâl dal grup, al interprete “Sborfadôr”.
LA RESISTENCE DAI ZOVINS_Un altri toc al è “Levante”. «Al è un toc plen di resistence. La resistence cuotidiane dai zovins in dì di vuê. Cheste cjançon e je realizade in stîl folk cu las vôs dal “Coro popolare della resistenza” che o vin cognossut midiant dai amîs dal circul Misskappa di Udin». L’album al finìs cun “Živjeli S.p.A”, omazant ancjemò une volte chê che e je la nestre culture di condivision di plui lenghis. «Živjeli al è il toc che o doprìn par saludâ il public ai concierts, un mix perfet tra musiche balcaniche e vilote furlane: la misture perfete par cjalâ viers il futûr cun felicitât e positivitât».
FUTÛR_E pal futûr ce pensaiso? «Un gnûf album, un film, un documentari sul stîl “Quark”, un tour in dute Italie, anzi in dut il mont! Intant, a insumiâsi no si fâs pecjât!»
Lôr a son Paolo Drigo (vôs) – che al sarès chel „Aldo Sbadiglio” dal non -, Luca Politti e Gianni Travaglia (ghitare acustiche e côr), Michele Olivo (tastieris, armoniche e côr), Carin Marzaro (bas eletric) e Alberto Zenarolla (batarie e côr). ❚
Moira Pezzetta