La sagre, te culture furlane, e à vût simpri une impuartance fondamentâl, massime une volte, cuant che – par vie des pocjis machins par lâ ator e pal fat di tacâ a lâ a vore di canais – no jerin tropis alternativis par fâ fieste. E cuissà tropis fameis furlanis che a àn di dî graciis a une sagrute di paîs se il nono e la none, un secul indaûr, a àn podût cognossisi e tacâ a morosâ…
Leadis tradizionalmentri a celebrazions religjosis – tant che la fieste dal Patron o de Madone – e cuasi simpri dongje di cualchi moment dai lavôrs tai cjamps come la vendeme, la seseladure o la purcitade, une volte la sagre e jere centrade sul marcjât: cence centris comerciâi ultramodernis, e jere une ocasion rare par cerçâ cualchi plat “de fieste” o par comprâ alc dificil di cjatâ te buteghe dal paîs. Al baste pensâ aes sagris marcjât secolârs di Dael, di Pontebe, di Vile Santine o ae sagre “dai Osei” di Sacîl.
Il gustâ, la musiche (un omenut cu la armoniche o un complessut di int dal puest) e il “bal sul breâr” in place o te sale de latarie, a jerin – disìn – un alc di plui, une maniere di concludi in bon stâ une zornade speciâl, mangjant in compagnie un plat umil di frico e polente.
Di chê volte, i timps a son un grum cambiâts cun la “societât dal benstâ”: il marcjât de sagre al à pierdude la sô impuartance, divignint une rassegne di bancuts di lizerecis e golosets, plui che une spietade e reâl oportunitât di compris. E l’aspiet dal intratigniment al à tacât a fâle di paron, cun menûs simpri plui articolâts e plats simpri plui salutiscj e insolits, e cun professioniscj clamâts a sunâ, des “orchestris spetacul” plenis di int cun tant di corierutis e lustrins, aes “seradis disco” pai zovins, fin a clamâ ospits plui o mancul famôs.
Dai agns ’60-’70 fin in dì di vuê, ciertis sagris a son di fat deventadis vêrs e propit events, piçulis industriis dal intratigniment che – ancje doprant risorsis publichis destinadis ae promozion turistiche, e fasint cont su la mobilitazion volontarie di une comunitât interie – a son deventadis une realtât di grancj numars, par afluence e par zîr di afârs.
No cence polemichis de bande di ristoradôrs che dispès a àn acusât lis sagris di concorence sleâl pal fât di vê une fiscalitât plui favorevule di un ristorant o di une sale di bal, e di tirâ indenant sul lavôr no paiât dai volontaris. E – in dì di vuê, cun la crisi che e muart – lis polemichis si son ancjemò plui complicadis, pal fat che de bande dal public i bêçs a son simpri mancul, e nol è simpri ben clâr il confin dai contribûts par robis di rilevance turistiche, la necessitât des comunitâts di inventâsi alc pe int di chenti e une normative che di fat e rint la situazion une vore imberdeade, par une Pro Loco o par une Associazion che e vedi voie di organizâ la sô sagrute.
Al reste il fat che fevelâ in gjenerâl di sagris nol è facil pe varietât di situazions che a jentrin in cheste definizion: dal event plui grant e articolât, ricognossût tant che “event di rilevance regjonâl”, come il Festival di Maian o la Fieste dal Vin di Cjasarse, fin a la plui piçule sagrute dal plui piçul borc di mont, dulà che ancjemò si respire l’aiar de sagre di une volte, cun dut il pais mobilitât, dal fantaçut a tirâ sù lis scovacis al impresari che al preste il furgoncin. Par no fevelâ des “sagris des sagris”: “Friuli Doc” a Udin, “Sapori Pro Loco” a Vile Manin, “100 Paesi in Festa” di là da la aghe. De sagre plui vecje, cun tant di procession dal Patron o fûcs di Sant Zuan di druidiche memorie, fin ae plui gnove, tant che la multietniche Fieste des Magnoliis in borc Stazion a Udin.
In chest mont complicât, dut câs, dal sigûr une robe si pues rilevâ: il furlan no à nissune voie di fâ di mancul des sôs sagris, nol impuarte nancje cemût che – daûr dai timps e de economie – a sedin declinadis.
Une robe i aministradôrs locâi a varessin di tignî iniment: se no son bêçs, almancul cirìn di pensâ a une normative plui lizere, che e tuteli i professioniscj e che e valorizi lis potenzialitât turistichis, ma cence scjafoiâ di burocrazie e monadis lis comunitâts e la lôr voie di agregazion, element cussì inlidrisâts te nestre culture. ❚
✒ Margherita Timeus
Sindic jo mame / “La nestre int no à mai molât. Covente fâ, no lamentâsi, par saltâ fûr dal pantan”
Walter Tomada
Alessandro Marangoni: la Aclif e deventarà istituzion di riferiment pai furlans “La Assemblee dai sindics furlans e je une realtât necessarie. E cul timp e deventarà ancjemò di plui un pont di riferiment pe identitât de nestre int”. Al è sigûr di chest Alessandro Marangoni, prin citadin di Dartigne, che al crôt tant inte Aclif […] lei di plui +
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
Ricorence / Pier Pauli Pasolini om contraditori e segnâl di contradizion
Pre Toni Beline
Tal centenari de muart di Pier Pauli Pasolini o ripuartìn a tocs la tierce part dal libri scrit di Antoni Beline tal 1993 ‘Trilogjie tormentade’, che e rivuarde propit il poete di Cjasarse I. RISPIETÂ IL MISTERI DAL OMLa sience plui dificile e je la cognossince di se stes. E se al è grivi cognossi […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +