Lis reazions dai politics sui media regjonâi

In Friûl, coments e reazions a son stadis cuant che i zûcs a jerin fats, dopo de aprovazion de leç. Variis lis vôs che si son sintudis sui media de regjon.
L’ex conseîr regjonâl Giorgio Cavallo al à sclarît che «In Senât a son stâts presentâts emendaments (tancj in riferiment al ricognossiment di fevelis regjonâls) ma in realtât il dibatiment si è concentrât sul emendament a pro dal sart proponût dal senatôr Uras. Il refudament de propueste e à provocât reazions fuartis in Sardegne, un interès enormi dai mieçs di informazion e al à provocât posizions tant duris de stesse maiorance regjonâl (di centriçampe). Il President de Regjon Pigliaru al à fevelât di “discriminazion inacetabile”. O ai controlât i emendaments presentâts a Palaç Madame ma no ’nd è un sul furlan e la Regjon Friûl-Vignesie Julie. O crôt che sedi di sveâsi: pai parlamentârs e pal President de nestre Regjon».
Il sindic di Udin, Furio Honsell, al à domandât «ai parlamentârs che a rapresentin la nestre regjon di fâsi part ative inte difese de lenghe furlane intal ambit dal dissen di leç su la riforme de Rai».
L’ex president de Provincie di Udin Marzi Strassolt al à vût dit «La storie si ripet: il dissen di leç su la riforme de Rai al lasse fûr ogni misure pe minorance furlane e par chê sarde, che a rapresentin la maiorance di dôs regjons a statût speciâl e la uniche vere justificazion de lôr specialitât» e al domande la mobilitazion de Regjon, tant che al è sucedût in Sardegne, dai deputâts furlans e de base autonomiste.
Sul front di Leghe Nord, Massimilian Fedriga, cjâf grup ae Cjamare e segretari politic pal Friûl- Vignesie Julie al à tonât «Se il Pd nol tutelarà il furlan al sarà Vietnam», e un Pieri Fontanini infuriât – president de Provincie di Udin – al invide ae proteste fiscâl «Al è rivât il moment che i furlans a àn di refudâsi di paiâ l’abonament Rai. Chel che al è sucedût al Senât al è tant grâf. Une  vergogne inacetabile che e dimostre no dome la ignorance totâl dal Guvier, ma la volontât precise di lâ indevant a movisi simpri cul stes metodi.».
Il senatôr Pd Carlo Pegorer al riclame i risultâts otignûts intal passât invidant al sintiment, intune note zontade intune cul coleghe sart Silvio Lai. «L’impegn autonomist pe valorizazion des lenghis minoritariis al domande une impostazion inovative, ma misurade e serie. Todesc e ladin, francês e sloven a son lenghis di minorancis nazionâls in Italie, tuteladis di tratâts internazionâi, normis di ranc costituzionâl e leçs specifichis. Furlan e sart a son al moment tutelâts dome de leç 482/99».
Tignint cont de legjislazion in vore, duncje, «no si trate di cori daûr a ogni norme che il Parlament al discut, intun empit utopic e, cualchi volte, caricaturâl, ma di fâ buine une norme tant che la Cjarte europeane des lenghis minoritariis, che e je par rivâ ae discussion de aule dal Senât, in graciis di iniziativis legjislativis di nô proponudis».
Par Diego Navarria, president de Assemblee des Comunitâts furlanis «Il Senât al à aprovât un test inacetabil. Une discriminazion fate e finide. No ai nuie cuintri la minorance slovene ma e je cuintri la Costituzion une disparitât di tratament tra slovens e furlans. Su cualis basis si podaraial lâ indevant a sostignî la specialitât de nestre Regjon?».
E al repliche cun decision a Pegorer: «Nol à nissune fonde juridiche e al fâs sgrisulâ che il nivel di tutele costituzionâl dal furlan e dal sart al sedi plui bas di chel di altris comunitâts»; par Navarria la Cort Costituzionâl e à precisât «che no je ametude nissune discriminazion tra lis dodis minorancis linguistichis ricognossudis e tuteladis de Costituzion. E la difese di un dirit fondamentâl nol è propit, cemût che al sosten Pegorer, fi di gno “empit personâl veleitari e cualchi volte caricaturâl”, ma un dovê che no ai nissun intindiment di gjavâmi».
Di Rome, la coordenadore regjonâl di Forza Italia Sandra Savino e clame i parlamentârs dal F-VJ a un front comun inte discussion su la riforme ae Cjamare, dulà che e sente tant che deputade. «Mi auguri che a Montecitori i parlamentârs de Regjon si movin compats, lant di là dai confins di apartignince, par sostignî cun autorevolece un emendament che al corezi la assence dal furlan inte riforme de Rai. Al è in zûc il rispiet di dut un popul che al Stât al à dispès plui dât che vût».
O starìn a viodi se par chê volte dutis chestis vôs si jevaran prime che i zûcs a sedin fats… ❚
✒ Dree Venier