Sfuei Mensîl Furlan Indipendent
Archivi de Patrie

LIS PARABULIS DI PRE ANTONI. Il canarin di Pasche

............

Pasche e je Vite, e je Resurezion, e je Vierte, e je Lûs, e je Novitât. E dut ce che al fevele di vite e di resurezion… in cualchi maniere al riclame la Pasche. Par chel ancje un canarin che al cjante in glesie a Pasche al è tant che un agnul che nus ricuarde il grant event: che la vite e je plui fuarte de muart. La predicje le fâs ancje un canarin.

pre Roman Michelot

De Pasche di chest an, mi bastarès che la int si visàs dal canarin che o vin puartât in glesie tal triduo sant. Al à tant di chel cjantât, ma tant, che la int e jere come instupidide a sintîlu. E a ogni sgosade che al faseve, i fruts e i grancj si pocavin ridint. E cuant che si fermave, no spietavin che il plevan al predicjàs, ma che il canarin al tornàs a tacâ.

Cetante contentece inte Pasche di chest an! E se nus à judâts il canarin cul so cjant, che Diu lu benedissi. Ciert che lui nol capive nuie dal misteri, come che nol varà capît nuie il gjal che al cjantave par contâ i rineaments di Pieri. Come che no varan capît nuie i testemonis direts di chescj grancj fats. Il capî al è relatîf, e ancje la fole dai partecipants. L’impuartant al è che a sucedin.

O soi sigûr che il predi plui disfortunât al à vude plui int joibe sot sere che no Crist inte ultime Cene, e ancje Vinars sant rispiet ai spetatôrs de muart di Crist, pôcs e distrats. Par no fevelâ de Pasche, che al è resurît cence che nissun i batès lis mans o i fasès di testemoni. Epûr, lis nestris gleseadis di int a son une palide ombre di chei fats sucedûts tal cidinôr e tal misteri.

No je la procession di int viers dal sepulcri che e fâs resurî Crist, ma e je la resurezion di Crist che e tire la int viers dal sepulcri vueit. E denant di un misteri cussì grant, ogni segnâl al è bon e inadeguât. Cussì il gno canarin al pues fâ ricuardâ la Pasche plui di dutis lis liturgjiis e lis omeliis di chest mont.

di pre Antoni Beline

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +