LIS PARABULIS DI PRE ANTONI. I papavars

In cheste stagjon, cui no viodial cjamps furnîts di papavars? Salacor a un voli distrat e sbadât no i disin nuie. Al voli di pre Antoni, voli di poete e di om di fede, no deventavin dome un cuadri de nature di rimirâ, ma ancje parabule, segnâl, olme dal misteri de vite e de gracie, presince di Diu.
pre Roman Michelot
Une dì o jeri lât a cjaminâ cul gno solit vie par chês campagnonis de Basse, cussì largjis e cussì vualivis e cussì compagnis. A colp, voltant par une stradele, mi soi intivât intun cjamp di forment tant grant, ma tant grant che nol veve fin. E tant fis che mai.
In dut chest splaç a jerin trê papavars. Dome trê. Ma a jerin cussì vîfs che si ju viodeve lontan lontan.
O ai çavareât dentri di me: «I papavars a son biei, ma se il cjamp al è dut di papavars ce si mangjial? Il forment al è bon, ma se nol à ancje un sclip di furniment, no i mancjial alc di impuartant?».
O crôt che chei trê papavars tun cjamp di forment a sedin une parabule stralusinte dal misteri dal ream di Diu. ❚
pre Antoni Beline