FONDAZIONE FRIULI
A son 158 i progjets presentâts par partecipâ ai bants tematics 2018 inviâts de Fondazione Friuli che chest an e metarà a disposizion 1 milion e 900 mil euros in graciis dal contribût metût di Intesa San Paolo. La iniziative e je stade presentade ai 30 di Mai te sede de Fondazione Friuli in vie Manin a Udin. Chê inviade cun Intesa San Paolo e je pe fondazion une colaborazion vincente, viodût che si trate di une bancje dal teritori che e davuelç un rûl impuartant tal sostegn ae culture, ae art e ae economie: duncje, e à decidût di sostignî une progjetualitât inovative e funzionante, metintsi in scolte des dibisugnis de comunitât cun intervents plui smirâts e in linie cu lis sfidis dal futûr.
Intant dal incuintri, si à volût dâ cont propit di cheste strategjie condividude cui bants 2018 indreçâts a istruzion, welfare e restaur dai bens artistics: midiant di chescj, tantis associazions e ents che a operin a Udin e Pordenon a podaran tacâ a doprâ risorsis che, se no, no saressin disponibilis ancje par vie dai fonts publics che a son in câl.
«La oportunitât di lançâ i trê bants istituzionâi di Intesa Sanpaolo – al à dit il president de Fondazione Friuli Giuseppe Morandini – e à moltiplicât la pussibilitât di intervent, cjatant une rispueste pronte des associazions, che a àn presentât progjets inovatîfs di rêt a alt potenziâl in tiermins di impat sociâl, culturâl e economic, in stât di creâ efiets sul teritori dulà che al è previodût l’intervent».
La sale cunvignis di vie Manin e à ospitât la associazion di volontariât onlus Laluna di San Zuan di Cjasarse e la Fondazion Morpurgo-Hofmann onlus. Laluna e à presentât un progjet inte suaze dal bant welfare clamât “Lalunanuova 2.0”, che al previôt la realizazion di orts sociâi che a produsin prodots biologjics. L’obietîf al è chel di realizâ une cusine che e permeti la continuazion de filiere midiant de lavorazion dai prodots de tiere e de lôr distribuzion ae comunitât locâl: si implearan fin a dîs personis cun disabilitâts.
Dentri dal plan di ricualificazion di borc Praclûs, al jentre invezit il progjet de Asp La Quiete di Udin par doprâ la zone militâr e di recupar e risanament conservatîf dal imobil “ex alozament dal personâl religjôs”, che al ospitarà la gnove sede operative de Fondazion Morpurgo-Hofmann e il Centri di ricercje invecjament atîf (Cria).
Al tiermin dal incuintri, il diretôr regionâl di Intesa Sanpaolo Renzo Simonato al à donât al president Morandini la pergamene siglade dal re di Italie Emanuele III di Savoia ai 5 di Otubar dal 1924 cuant che si à inviade la costruzion dal ospedâl civîl di Udin, dulà che la casse di sparagn di Udin e veve contribuît a comprâ il teren e po e veve dât il so contribût. A son stâts donâts ancje la pene, il calamâr e la cjace doprade pe prime piere: «Cun chest – al à spiegât Renzo Simonato -, o vin volût marcâ il leam fuart che o vin simpri vût cul teritori, inte continuitât di une tradizion antighe che e met dongje il sens di responsabilitât sociâl cui valôrs leâts ae economie reâl. In merit a chest, o ricuardi che tal nestri plan di imprese 2018-2021 si previôt che Intesa Sanpaolo e deventi un pont di riferiment ancje in tiermins di responsabilitât sociâl e culturâl». ❚
Piero Cargnelutti