Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ
A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i agns complicâts di un pont di viste meteorologjic; daspò la sensibilitât ai agrofarmacs neonicotinoits; po dopo la pericolose e insidiose jespe velutina; dopo la crisi climatiche; dopo… Cun dut achel, al pâr che i nestris apicultôrs no si sedin avilîts e che, anzit, al sedi stât un gnûf svicinament al arlevament, cemût che a certifichin i dâts dâts fûr di resint dal Ersa, e che a fasin riferiment al 2022.
◆ Intal 1999, in Friûl-Vignesie Julie a risultavin 1.623 apicultôrs e 25.182 bôçs. Di chê volte, la apiculture regjonâl si è disvilupade in maniere progressive, viodût che, intal 2022, il numar di apicultôrs al è lât sù a 2.018 (+56,2% a pet dal 2016), e il numar di apiaris al à passât cuote 4.600 (+71,3%). In provincie di Udin a operin 1.045 apicultôrs, in chê di Pordenon, 629, a Gurize 278 e a Triest 192, ma cuntune incressite dal 166,7% sul 2016.
◆ Lis impresis che a lavorin inte apiculture (cjapadis dentri chês che par lôr no je la ativitât primarie), intal 2022 a son stadis 269, localizadis pal plui inte provincie di Udin. In cheste aree, cun di plui, al è stât regjistrât il 52% dai apicultôrs, il 52% dai apiaris, il 60% dai bôçs e il 68% dai scuams.
La Cjargnele e resist
Il rapuart bôçs/apicultôrs, intal 2022, al è stât di 19,1 (21,6 a nivel talian) e in sostance al è restât stabil intal timp dal 2016, gjavant il 2019, cuant che al à rivât al valôr massim regjistrât: 20. Ancje la densitât dai apiaris (numar di apiaris par chilometri cuadrât) e je cressude in maniere progressive: intal 2022 chest valôr al è stât di 0,58, in cressi dal 36% a pet dal 2018 e in linie cu la medie taliane.
◆ La densitât des impresis (numar di apicultôrs par chilometri cuadrât) e je di 0,25, a pene plui alte de medie taliane, che si ateste suntun valôr di 0,24.
La apiculture convenzionâl, che e à contât 1.977 apicultôrs e 4.405 apiaris intal 2022, e je la modalitât di arlevament prevalente a pet di chê biologjiche (53 operadôrs e 196 apiaris censîts).
◆ I apiaris a son pe plui part stanziâi: intal 2022 a son risultâts 4.115 a pet dai 472 nomadics. Interessant notâ ancje cemût che in 316 apiaris regjonâi (il 6,87% dal totâl) e vegni arlevade la âf tipiche dal nestri teritori (e di chei alpins dongje): la sotspecie Cjargnele (Apis mellifera carnica) che, par altri, e svante une rusticitât e un caratar mancul agressîf che no la âf taliane plui difondude (Apis mellifera ligustica).
◆ Intal 2020, in Friûl-Vignesie Julie a son stadis produsudis 795 toneladis di mîl (XI produtôr talian). ❚
