Sfuei Mensîl Furlan Indipendent
Archivi de Patrie

(L)INT FURLANE. In Friûl no si rive dome vie mâr

............

✽✽ In chescj ultins timps mi è capitât di jessi a Triest in maniere divierse di cemût che o jeri usât: no plui i lûcs studentescs de vite universitarie, lis ocasions di lavôr, di croniche, che si fasin intal centri citât, ma o ai viodût i cuartîrs su la culine, o ai viazât dilunc dai puints, osservât i imbarcjadôrs e lis banchinis. E mi soi inacuart che e je une grande citât, un grant puart. O continui a pensâ che no larès mai a stâ, ma no pues no rilevâ la sô dimension metropolitane, maritime, centri internazionâl di trafics e di cumierçs. Une dimension che e risulte ancjemò di plui acentuade devant dal program di disvilup previodût, denant dai lavôrs za in cors par rinfuarçânt il rûl. E mi son tornadis iniment ciertis peraulis ditis dal professôr Flavio Pressacco in ocasion di une cunvigne su Aquilee: «Tra i elements de fin de citât romane, ma ancje dopo dal Patriarcjât, al è stât dal sigûr il declin progressîf di chel fluviâl pe prime e la debilece portuâl a pet de Serenissime intal secont câs». Ve che alore ancje inte lungje bataie pe autonomie dal Friûl, il rapuart cun Triest al à di jessi associât ae cuistion dal so puart, ae sô gjestion e ai inflùs che chel al podarà determinâ intai rapuarts di fuarce, sedi economics che istituzionâi.

✽✽ Al zove visâsi che i paris fondadôrs di cheste regjon, Tessitori in primis, a àn fate une sielte precise tra il restâ leâts in cualchi maniere a Vignesie o a Triest, optant par cheste ultime. La situazion cierte e jere divierse cul destin de citât juliane ancjemò intes mans dai aleâts, un futûr emporiâl dut di definî e duncje, ai voi dai autonomiscj, plui debil a pet dai apetits venits, ae fuarce eletorâl dai furlans. Vuê la situazion e je cambiade parcè che decenis di aministrazion regjonâl a àn dimostrât che no je mai esistude une maiorance furlane compate e omogjenie buine di fâ valê i siei interès, in secont lûc parcè che di une “coesistence pacifiche”, di un belançament politic si è passâts a di un centralisim di stamp triestin che al va di là dal pês dai coleçs eletorâi furlans.

✽✽ E va duncje tornade a studiâ la posizion di cjapâ bande la realtât teritoriâl e istituzionâl, ben savint che Friûl e Triest a puedin convivi dome inte clarece dai rûi e intal efetîf, dopli esercizi dal podê. Savint di subite che i puarts a vivin midiant des tratis des nâfs, che lis rotis a cambiin e i puarts si sierin, intant che in Friûl no si rive dome vie mâr. ❚

Dree Valcic

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +