(L)INT FURLANE. Il Friûl te epoche dai monsons

✽✽ Une volte mi fasevin fâ bocje di ridi lis espressions gjornalistichis tant che “bombe di aghe e plombe jù su la citât”. Mi someave esagjerât devant di un avigniment atmosferic doprâ tiermins di vuere.
✽✽ Vuê mi soi ricrodût e o soi convint, devant dai fenomens simpri plui fis di chest gjenar di temporâi che si presentin in Friûl, che o sin in presince di alc che al lasse scaturîts.
✽✽ Il clime al cambie e no si trate plui di episodis sporadics. L’alarme lançât dai sienziâts nol è dome teorie, ma une realtât che o vivìn in maniere personâl su la nestre piel. No sai se la espression corete di un pont di viste tecnic e sedi “clime monsonic”, ma ciert al à dutis lis carateristichis.
✽✽ No je une semplice constatazion, al rapresente invezit un motîf seri di riflession par ducj nô furlans, clamâts a interogâsi su ce che al sarà de nestre agriculture, dal turisim, di tantis ativitâts li che si rêç la nestre economie e la vite sociâl stesse.
✽✽ Cemût rispuindi ai cambiaments globâi e je une domande che, tant che regjon autonome, o vin di jessi in stât di savêi rispuindi, vuê e no cuant che i efiets a saran palês.
✽✽ A ce coventie la autonomie, la specialitât che o ’nt fasìn bandiere, se no a dâ soluzions diviersis, par vie che a son strategjichis e in stât di mantignî, forsit trasformantle, la nestre identitât che e nas di un rapuart diret e ancestrâl cu la nature, la tiere e il cîl? ❚
Dree Valcic