Sfuei Mensîl Furlan Indipendent
Archivi de Patrie

(L)INT FURLANE. E je ore di cjapâsi la responsabilitât

............


.
.

Se o lessin daûr des siglis e des acuilutis variis che a vegnin fûr ogni dì su lis pagjinis di Facebook, o podaressin dî che il moviment autonomist al è daûr a vivi la sô stagjon miôr. **Domandâsi, cemût che al faseve “il Mostacjon” “cetantis divisions che al à il Vatican” al sune dûr, ma al sarès disonest ancje no interogâsi sul pês politic reâl, organizatîf e sociâl, di presince sul teritori, che al sta daûr di chescj moviments, grups e amiciziis. Za doprâ la peraule “moviment” al ven dificil. Se o lessin a verificâ dulà e cuant che si son viodûts “fâ”, al di là di un dibatiment astrat, ma intal procedi, ancje lunc e fadiôs, de bataie autonomiste furlane, il risultât al sarès deludent.
**Ma la linie di chest gjornâl e à simpri e in dut câs dât spazi a ducj, convinçûts che lis motivazions ideâls a fossin l’element di fonde di cualsisedi azion fate. No par chest si à di rinunziâ ae critiche, cuant che si stime che la direzion cjapade no rapresenti i interès dal nestri popul. E ca o vignìn al vuê.
**Di timp, anzit di simpri, fin dal lontan 1946, o sostignìn che pal riscat dal Friûl e covente une presince politiche distacade, distinte e in oposizion ai partîts talians. Nissun compromès su chest pont: di ca si partìs, cun clarece.
**La seconde ciertece e nas de situazion di cumò che e je daûr a vivi cheste Regjon, mâl nassude e Triest-dipendente, là che, in graciis des politichis prime di Tondo e dopo di Serracchiani, la stesse sorevivence istituzionâl e je sot atac.
**Lis sortis dal Friûl dut, de Livence al Timau, a son leadis, volenti o nolenti, ae fuarce di meti in cjamp par contrastâ chest progjet.
**Dut chest nus puarte in maniere direte ae sfide eletorâl dal an che al ven, aes regjonâls, dulà che, une volte sclaride la dibisugne di une presince autonomiste in Consei, al reste di decidi se cheste e varà di jessi une testemoneance o rapresentâ la ultime prove par impedî il colàs definitîf.
**Intal prin câs, lin pûr indevant a svuarbâsi su cui che al è chel plui pûr, chel plui coret “chel plui fedêl ae linie” ma savint che il risultât, forsit, al sarà chel di plantâ une “bandierute” doman, intant che al moment si semene dome confusion e si ripropon la imagjin di un arcipelac furlanist litigant e barufant. O pûr, decidìn che al sedi rivât il moment di cjapâsi chês responsabilitâts di guvier che su la cjarte a somein utopistichis, ma che a restin invezit l’unic mût par invertî, se ancjemò si pues fâ, la rote dal declin.
**Par pontâ a chest gjenar di risultât al covente che la propueste autonomiste e concuisti setôrs diviers, sensibii ae tematiche identitarie: ven a stâi, che a traviodin inte serietât des feminis e dai oms proponûts, inte concretece e inte validitât dai programs, intal dinei des logjichis dai partîts talians, une alternative pussibile e crodibile.
**Il rest a son fufignis.
Dree Valcic

Stin dongje ae Patrie

Redazion
La seconde edizion de manifestazion “Stin dongje ae Patrie” e rapresente un moment di incuintri e di solidarietât cul mensîl “La Patrie dal Friûl”, gjornâl scrit fûr par fûr in lenghe furlane fintremai dal lontan 1946. Inte serade, che e sarà presentade dal diretôr Walter Tomada e di Serena Fogolini, si daran la volte musiciscj, […] lei di plui +