✽✽ Se si metessin tant che brâfs scuelaruts devant di un sfuei blanc cu la pene in man, e o vessin chê di butâ jù i compits che a spietin i furlans in chest 2020, no savaressin propit di ce bande scomençâ. Di fat, se o fasessin il cont di ducj i problemis che a cruziin la nestre int in chescj ultins timps, al sarès dificil fâ une graduatorie o ancje dome sielzi il teme dulà intervignî in maniere plui urgjente. A voli, o disarès che chel de denatalitât al sedi simpri plui l’element centrâl di cualsisedi analisi e azion consecuente.
✽✽ Propit par mantignî une vision dal dut strategjiche, o varessin di partî dal cirî soluzions a chest drame: ce sens varessial fevelâ di lavôr, di ambient, di coletivitât, se il destin nus risierve – numars in man – un futûr di desertificazion dai nestris paîs, cui risultâts che ducj o notìn, tacant de mont ma cun efiets che si slargjin aromai fin te Basse? Il Friûl nol è un paîs par zovins. Facil constatâlu, dificil meti in at politichis che almancul a provin a frenâ il fenomen. Viodêt che no bastin plui dome “cerots” o aspirinis, e forsit nancje i antibiotics no podaran salvâ un cuarp che al sofrìs cheste malatie che si clame estinzion. No vin di vê pôre di nomenâ chest tiermin, parcè che dome cu la cussience di jessi rivâts a un pont che no si torne indaûr dal nestri jessi furlans, o rivarìn a cjatâ la fuarce di rivoltâsi e di provâ a mudâ la rote.
✽✽ Par fâ chest, però, nus covente une buine autolavade dal cerviel, e si à di finîle cui vaiarii, cu lis spietis che cualchidun al vegni a risolvi i nestris berdeis. Cjapâ distance dai partîts – ma o olsarès dî de logjiche taliane, dal so imbarbariment politic – al devente necessari e vitâl.
Se o sin ancjemò convints di podê esprimi tant che popul furlan une nestre vision dal mont, se o vin conservât cierts valôrs – vuê deventâts incompatibii cun globalisims e ideologjiis che a metin al prin puest individualisim e competizion, e no il ben comun – al è rivât il moment di molâ di fevelâ te ostarie o di bruntulâ su Facebook.
✽✽ Al è il timp des responsabilitâts personâls e coletivis. A cjase, a vore, a scuele, in glesie.
Si sint une cjampane e no volìn che e suni di muart, ma che e clami dongje ducj. ❚
