Nus à lassâts ai 3 di Dicembar dal 2019 il professôr Gianfranco D’Aronco, l’ultin dai grancj paris de Autonomie che al à dedicade une lungje vite di studi e di passion a difindi lenghe, culture e identitât dal Friûl. Cun chestis peraulis di corot Sergio Cecotti lu à saludât al so funerâl che al è stât celebrât in Domo a Udin
O pensi di podê fevelâ no dome a titul personâl ma ancje a non di ducj chei – e a son tancj – che, come me, a àn viodût, e ancjemò a viodin, in Gianfranco D’Aronco un mestri e un spieli, e si considerin, se no altri in sens ideâl, siei arlêfs.
Jo o ai vude la fortune di cognossilu e di lavorâ cun lui, in particolâr te mê prime esperience di Sindic di cheste citât, une esperience tal segn di un autonomisim concret e insiemi sumiadôr. Gianfranco al jere stât il garant culturâl e – o disarès storic – di chê fase cuant che, al dîs il Poete, “al jere zovin ancje il mont”.
La vite – lungje e produtive – di Gianfranco D’Aronco e je state dute marcade dal impegn pal Friûl, pe sô autonomie, pe sô culture, e pe sô cressite sociâl e civîl. Nol à mai molât. Cu la sô serenitât, la sô ironie sutîl e cu la inteligjence che e inclaudave i contraris ae miserie dai lôr argoments cence ofindiju. D’Aronco al è un dai precursôrs de autonomie regjonâl, fin di prime de Assemblee Costituente, tant che man drete di Tiziano Tessitori. Gianfranco al à tacât a dâsi di fâ za tal Istât dal ’45, pocjis setemanis dopo de fin de ditature fassiste.
Bisugne ricognossi a Gianfranco, e ai siei compagns di in chê volte, il merit e la luciditât storiche di vê capît par prins che, par lassâsi daûr des spalis la dramatiche esperience storiche dal fassisim, nol bastave sostituî “inte stanzie dai botons” i oms in cjamese nere cui rapresentants dai partîts democratics: al coventave ancje – e soredut – mudâ insot la struture stesse dal Stât talian, parcè che, se il fassisim al jere stât “la autobiografie de Nazion”, bisugnave superâ chê idee di “Stât-Nazion” par sostituîle cuntune Republiche federâl fondade su lis realtâts storichis e popolârs, o almancul cuntune Republiche di autonomiis fuartis e cussientis.
La idee di autonomie di chei precursôrs e jere alte e e cjalave lontan. Lôr no pensavin ae Regjon autonome tant che a une des tantis articolazions funzionâls de “Aministrazion Publiche”. Par lôr, la autonomie e veve une funzion storiche precise: il disvilup economic, sociâl e culturâl dal teritori su la fonde des sôs aspirazions plui autentichis. Lôr a volevin une Regjon che e fos il motôr di trasformazions struturâls, une Istituzion che i furlans a podessin jessi braurôs dai siei risultâts e de sô ecelence.
In chei stes agns, Pasolini, che al incuadrave dut in tiermins di poetiche, al diseve che “la autonomie e covente par creâ civiltât”. Une specifiche civiltât furlane, al zontave. E no ciert tune visuâl limitade, locâl, ma intune prospetive universâl: a volevin che i furlans a contribuissin di protagoniscj al progrès gjenerâl de umanitât, che a fossin braurôs di podê dî “o sin un popul piçul, ma o vin puartât un nestri contribût origjinâl al progredî dal mont, e la strade dal avignî e je segnade ancje de nestre olme”.
In tiermins storics, Gianfranco D’Aronco al podarès jessi definît no dome un precursôr ma ancje un vincidôr: lis dôs bataiis principâls de sô vite – meti sù la Regjon autonome e la Universitât dal Friûl – vuê a son fats realizâts.
Ma no podìn evitâ la domande: si ricognossevial Gianfranco D’Aronco tes dôs “Istituzions reâls” che lui al veve cussì tant contribuît a fâ nassi?
Al jere critic. Dal rest, podevial ricognossi tes “riformis” des autonomiis locâls di chescj ultins agns la idee dai Paris de autonomie che lis Istituzions politichis democratichis a son “fabrichis di civiltât”? “Fabrichis di civiltât” chê robe li, ma dulà?
A saressin tantis altris robis di zontâ: l’impegn pe lenghe, la ativitât di filolic, la riscuvierte dai tescj antîcs dal furlan, il studiôs di leterature popolâr. O pues dî di vê imparât il furlan su la “Nuova Antologia della Letteratura Friulana” di Gianfranco d’Aronco, la prime mitiche edizion.
O sieri cu lis peraulis di un altri autonomist furlan de gjenerazion dai precursôrs – un om e un inteletuâl che cun Gianfranco al à vût un rapuart dialetic no cence dificoltâts e incomprensions ma, dut câs, une vore fecont pal Friûl e pe sô culture – Pier Paolo Pasolini, che al dîs: “No vai su la fin des mês ideis, che al vignarà un altri e al puartarà indenant la mê bandiere. O vai su di me”. Jo mi auguri, e o auguri al Friûl, che a sedin in tancj i furlans – massime tes gnovis gjenerazions – che a cjapin sù la bandiere di Gianfranco D’Aronco par puartâle indenant, cu la sô stesse dedizion e serietât, cetant plui inlà di dulà che a àn savût fâle rivâ i siei dissepui de mê gjenerazion.
Cungjò Gianfranco. ❚
