Sfuei Mensîl Furlan Indipendent
Archivi de Patrie

Silvia Stefanelli, competence e ideis par frontâ i cambiaments climatics

Erika Adami
GRUP DI CICLISCJ DAL PROGJET “RIDE WITH US”, CHE AL À L’OBIETÎF DI STIÇÂ ATENZION SUI CAMBIAMENTS CLIMATICS PEDALANT INSIEMI VIERS LÛCS SIGNIFICATÎFS LEÂTS AL RISCJALDAMENT GLOBÂL
GRUP DI CICLISCJ DAL PROGJET “RIDE WITH US”, CHE AL À L’OBIETÎF DI STIÇÂ ATENZION SUI CAMBIAMENTS CLIMATICS PEDALANT INSIEMI VIERS LÛCS SIGNIFICATÎFS LEÂTS AL RISCJALDAMENT GLOBÂL

La storie di une furlane consulente pe Comission Europeane in materie di energjiis rinovabilis

Il cambiament climatic e je la sfide principâl dal nestri timp. E di front ae emergjence dai cambiaments climatics (che no tocjin dome i ors polârs, ma la vite di ducj nô, parcè che i lôr efiets si sintin dapardut: si visaiso dal burlaç Vaia? E dal cjalt che al gjave il flât?), la rispueste de Comission Europeane e je stade il Green New Deal. L’obietîf al è fâ deventâ la Europe il prin continent tal mont neutrâl dal pont di viste climatic dentri dal 2050, azerant lis emissions di anidride carboniche. Tal cûr de Europe, a Bruxelles, li de Direzion gjenerâl Azion pal clime, tal moment che si cjapavin chestis decisions fondamentâls pal avignî de tiere, e jere in vore ancje une furlane: Silvia Stefanelli.

Udinese, dopo di une lauree in siencis forestâls che le à puartade a lavorâ in Regjon, li de Direzion Ambient e energjie, Silvia e decît di inzornâsi, di slargjâ lis sôs competencis e di fâlu tal forest. E cussì, cuntun master in Economie ecologjiche in Scozie sierât cuntune tesi sul impat dal implant a biomassis di Darte (un dai prins in regjon), e torne in Friûl li che e tache a stâ daûr a progjets europeans che a tocjin clime e energjie e a fâ la consulente pe Comission Europeane in materie di energjiis rinovabilis, rûl dai boscs te agriculture, riduzion des emissions. Fuarte di chestis esperiencis, tal 2017 e vinç un concors internazionâl che le puarte drete a Bruxelles, te Direzion gjenerâl Azion pal clime, la struture che e vuide lis ativitâts de Comission Europeane indreçadis a contrastâ i cambiaments climatics a nivel internazionâl e de UE.

Il lavôr al è stimolant – si fonde su trasparence, merit e valorizazion des esperiencis academichis e professionâls di ducj – e l’ambient al è internazionâl. «Tal gno grup – la unitât su la gjestion dai ecosistemis agroforestâi par morestâ i cambiaments climatics – o lavoravin in cuindis, o rivavin di diviers Paîs europeans, sîs di nô si ocupavin dal setôr agriculture e boscs, ancje se lavorâ sul clime al puarte a viodi di tematichis pardabon trasversâls». E a confrontâsi ai nivei plui alts su cuistions che a tocjin il presint e il futûr di ducj. La Direzion, di fat, e davuelç ancje une part di vuide tai negoziâts internazionâi sul clime. E cussì Silvia e fâs part de delegazion europeane che e e partecipe aes conferencis mondiâls sui cambiaments climatics di Bonn, in Gjermanie, tal 2017, e di Katowice, in Polonie, tal 2018. Il pinsîr al torne a chês negoziazions complessis, che a varessin di puartâ ae atuazion dal acuardi di Parîs: il prin acuardi universâl – al è stât fat bon di 195 Paîs – e vincolant di un pont di viste juridic sul clime mondiâl, un puint tra lis politichis dal vuê e la neutralitât rispiet al clime.

A Bruxelles, Silvia e cognòs un ambient bon di saborâ i interès. «La citât e je incredibile – e conte -, e ufrìs un grum di oportunitâts di incuintri e di confront, leadis a modalitâts partecipativis dal bas e caraterizadis di une vision laiche, di une viertidure profonde che mi puartarai simpri dentri».

Cuntun bagai cetant siôr di esperiencis e di cognossincis – ancje in gracie dai viaçs in Lussemburc, Bulgarie e Romanie par monitorâ la situazion e il disvilup dai plans statâi indreçâts a rinfuarcî il rûl dai boscs tal ridusi lis emissions -, Silvia e decît di rientrâ in Friûl. Une sielte cuintri corint, intun moment li che tancj furlans a decidin di lâ tal forest a cirî oportunitâts di lavôr (i dâts a fevelin di 2 mil e 800 zovins dome tal 2018). «O vevi la pussibilitât di restâ a vore te Comission europeane, ma o ai decidût di no fâlu, sedi par motîfs personâi sedi pe voie di fâ alc pe mê tiere. Pal moment – a son passâts pôcs mês – o soi tornade a lavorâ in Regjon, o continui a stâ daûr a progjets europeans su la sostignibilitât, in spiete di un incarghe che mi fâsi meti miôr a pro ce che o ai imparât de mê esperience europeane». Ben savint che prime che dal alt ur disin ce fâ, tant, te costruzion de transizion ecologjiche, a puedin fâ i teritoris declinant il Green New Deal a nivel locâl. Pal Friûl, «si à di intervignî subit su lis fonts rinovabilis, concentrantsi su chês che a àn un grant potenziâl: lis biomassis, intindudis tant che refudons dal setôr agricul e dal arlevament, scarts de viticulture, de lavorazion de blave, doprâts par produsi energjie. E po si à di intervignî sui traspuarts, potenziant la rêt feroviarie pal traspuart di robis e di personis, e pontant ae intermodalitât, prime ancjemò de metude in vore dai regolaments europeans che, in ogni câs, a rivoluzionaran il setôr. Il Green New Deal al è necessari e nol à di jessi viodût tant che un pês – e marche Stefanelli -, ma tant che oportunitât ancje in tiermins economics e di creazion di puescj di vore. Tant al vâl preparâsi par ben e par timp cuntune vision di ce che o volìn deventâ». Sul fîl di chest resonament, al sarès ancje di pontâ a une agriculture diversificade. «Varietât e diversificazion a aumentin la resilience tai confronts dal clime e dal marcjât mondiâl».

E, pensant al so avignî, dopo vê rivât a realizâ il so sium di lavorâ intun contest internazionâl, «mi plasarès judâ lis comunitâts locâls, intervignint li che a son teritoris spopolâts, bandonâts – a ‘nd è tancj in regjon – cul recupar e cul potenziament di filieris agroalimentârs esistentis o cul inviament e il svilup di gnovis, che a puedin valorizâ ce che al à di ufrî il teritori, rinfuarcint o tornant a fâ nassi il sens di comunitât. Valorizâ lis produzions locâls, sostignibilis, rispietosis dal ambient, e podarès jessi une ocasion di svilup ancje in clâf di ecoturisim».

Intant che i progjets a cjapin forme, Silvia e da seont ae sô passion, grandonone, pe mont, miôr se lontane e disabitade, e pai viaçs no planificâts. Dal 2003 al 2011 e à traviersât in plui tapis la Asie in solitarie, de Indie a Hanoi. In Març e larà in Norvegje, tes isulis Lofoten, a fâ schialpinisim. ❚

 

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +