✽✽ Parcè publicâ un libri? Par doi motîfs: fâlu lei e insiemi mandâ un segnâl.
✽✽ Di fat, cui che al varà tes mans la opare di Diego Navarria “Patriarcjis fûr dal ordenari” si cjatarà devant di une conte storiche, fedêl inte ricostruzion des variis epochis e moments de Patrie dal Friûl, contade tal stes timp cuntune capacitât descritive moderne, no tradizionâl, o disarès fûr dai schemis classics de leterature storiche, che si pandarà agjile e inmagante. Merit di Diego, bon di trasformâ la passion “archivistiche” in civîl, rimarcant in chest mût che cualitât e capacitâts aministrativis a puedin cjatâsi e unîsi in chê inteletuâl.
✽✽ Cheste considerazion nus puarte drets ae seconde motivazion di une decision editoriâl: il segnâl.
✽✽ La grande part des acusis fatis ai autonomiscj, ai furlaniscj, e consist intal segnâju tant che fautôrs nostalgjics di un stât clericâl, di un passât improponibil. Balis spaziâls che a scuindin ben altris motivazions, prime fra dutis la negazion di une storie impuartante, di un rûl internazionâl, di une presince discomude par chei che a àn dissegnât une sole mape dal podê che e partìs di Rome, e passe pal Rinassiment, e tocje il Risorziment e di chest a ’nt fâs mari e adesîf unitari fin in dì di vuê.
✽✽ Se o stais atents no je, tra chês citadis, nissune epoche che no vedi vût protagonist – par lûcs, events, personaçs – il Friûl, e no dome in clâf taliane, ma europeane. Cu la diference sostanziâl che lu cjatarês in e cuntune posizion dispès divergjente, se no fintremai alternative, a chês uficiâls e scolastichis.
✽✽ Cun chest libri o butìn un messaç clâr e precîs: la diversitât e je la nestre reson di jessi, cun cheste al è stât segnât il troi dal popul furlan.
✽✽ A àn cirût, e a cirìn inmò, di cancelâ cheste ereditât che e rapresente il nestri Dna storic. Ai falsaris, o vin za dade une rispueste vincidore cu la publicazion di “Cuintristorie de prime vuere mondiâl” di Agnul Floramo; cumò o replichìn cun “Patriarcjis fûr dal ordenari” di Diego Navarria.
✽✽ Nol è che il principi di une lungje serie di bataiis cuintri cui che al vûl cancelâ il nestri jessi furlans. ❚
