✽✽ Us sarà dal sigûr sucedût in chest periodi, lant ator pes vuestris citâts, di notâ cualchi mega cartelon publicitari cun scrit “Io sono Friuli Venezia Giulia”. Une campagne publicitarie che si veve za viodût su lis pagjinis dai cuotidians. Al è dificil di capî cui e ce che a rapresentin chês musis discognossudis, che si fasin inmò plui anonimis inte lôr gjeneralitât, tant che a podaressin jessi piemontês, lombarts, romagnûi e vie indenant. Se po dopo la finalitât e je chê di piturâ un ritrat tipic de nestre int, alore ancjemò piês. Di fat, cui mai saressial in stât di riassumi intune uniche fisionomie lis diviersis carateristichis somatichis di cheste Regjon? Il risultât di chest ritrat “efevugjin” al sarès une specie di mascare grotescje: Frankenstein.
✽✽ Ma pal assessôr competent, e Promoturismo Fvg, che al è il so “braç armât”, si trate de plui grande operazion mai fate de Regjon par fâ cognossi lis ecelencis di chenti midiant, apont, de marche “Io sono FVG”.
✽✽ No vûl stufâus cun detais tecnics suntune campagne promozionâl, refudade di ducj i professioniscj dal setôr, ma domandâus, invezit, parcè che si ledi indenant par cheste strade cun arogance e supierbie, parcè che si insist, cun ducj i mieçs a disposizion, a imponi chest FVG che al à di aparî e di paronâ su ogni iniziative de Regjon.
✽✽ Al è un martielâ mediatic continui, indurant. No tu sês plui furlan, sloven, todesc, talian: tu sês dome FVG. Tu sês un “logo”.
✽✽ Secui di storie, di culture, di lenghe e di usancis scanceladis di une sigle!
Un mût par netâ vie la diversitât, un colp sec aes motivazions de nestre specialitât, une piconade aes fondis de autonomie, che ancje propit su la presince des diversitâts e fonde la sô configurazion istituzionâl.
Une operazion planificade e sientifiche di etnocidi. No vin di vê pôre di pronunziâ, di scrivi cheste peraule orende, che i plâs tant a ogni regjim autoritari. No vin di vê pôre tal declarâ che si trate di un prin pas bande il pinsîr unic: al varà di jessi cussì parcè che o comandìn nô. Che dut chest si fondi su la falsetât o su la ignorance, nol impuarte: e je la nestre veretât.
✽✽ E cui che no i sta? Ce mai saraial di chei che a laran indenant a dî che “Io sono FVG” e je une bufule grandonone?
✽✽ Atenzion: il pinsîr unic nol previôt compromès o refûts. La storie lu à za dimostrât in maniere tragjiche. ❚