✽✽ Al somee passât un secul di chê sere che, ai Colonos, un esponent de Resistence curde al veve sclarît ai presints lis resons de gnove strategjie adotade dal moviment tai confronts de Sirie. In sintesi, i combatents dal Rojava, devant de pussibilitât reâl di jessi cancelâts tant che popul de ofensive militâr turche, a rinunziavin ae ipotesi de indipendence di un Kurdistan unic e unît, par meti invezit lis basis di un acuardi dentri dal stât sirian. Il Rojava si sarès configurât tant che un teritori dotât di une autonomie poiade su trê pilastris: democrazie, rûl de femine e politiche ambientâl.
✽✽ Une disfate? Par cierts aspiets sì, se si pense aes prospetivis ideâls des miliziis curdis che, sul cjamp e cul sacrifici de lôr zoventût, a vevin batût l’Isis. Un pôc cemût che e jere stade viodude la gnove Italie di tancj partesans che a vevin lotât par un cambiament radicâl dal Stât e de societât.
A mi mi visave tant il discors dal Dalai Lama che, devant des persecuzions cinesis, al à rinunziât ancje lui al concet di un Tibet indipendent domandant a Pechin il ricognossiment e il rispiet dai dirits democratics pe sô int dentri de republiche popolâr.
✽✽ Altris senaris, altris prospetivis dulà che si fevele di vuere, muarts e distruzions che a someavin lontanis di chi, fin cuant che no vin vût di confrontâsi cun chest virus maledet e cu lis sôs consecuencis, imparant su la nestre piel ce che al vûl dî vê pôre dal doman, contâ lis vitimis, adotâ disposizions di improibizion, e pensâ che nuie nol sarà plui come prime.
✽✽ Se cussì al è il futûr, o vin di interogâsi cence pôre ancje sul autonomisim furlan, sul so rûl une volte passade la emergjence.
I tricolôrs pai barcons, chel “stringiamci a coorte” che al rimbombe – a dî la veretât, plui tant che tif di curve scaramantic che come impegn vuerîr -, di une bande a segnalin la dibisugne di tancj di cjatâ simbui e rituâi cognossûts e cualchi volte praticâts in altris ocasions, ma di chê altre a rapresentin par nô furlans un segnâl di interpretâ.
✽✽ A tornaran sù di sigûr, e za o notìn i segnâi, i mai impisulîts riclams ae centralizazion de vite publiche, aes declarazions di faliment des autonomiis regjonâls.
Dal rest, varessino rivât chestis, bessolis, a frontâ un drame di chestis proporzions?
La rispueste e je: no. Cheste cussience e compuarte il ricognossi che devant des “complessitâts globâls”, de economie ai traspuarts, de sanitât ae sigurece, no je pussibile dome une rispueste di “nicje”.
✽✽ Scomencìn a rifleti su cemût tradusi in pratiche e in propueste politiche chel che simpri o vin afermât, ven a stâi che o sin “citadins talians, di nazionalitât furlane”.
Che nus plasi o no, cheste e je la situazion che o vin di fâ i conts. E no sarìn dome nô. ❚