Ancjemò un an passât tra lis solitis injustiziis

✽✽ “Cjalâsi lis spalis” e je une espression che e va ben par descrivi un stât di alerte continui par ce che al pues sucedinus, ma “cjalâsi daûr des spalis” al è ancje un mût par fâ un belanç di ce che al è stât fat tal passât. A Dicembar dal an che al sta par sierâsi, o podìn cun trancuilitât afermâ che, par ce che al tocje il Friûl, no je nissune diference.
✽✽ O vin di constatâ che nol è cambiât nuie intes sieltis che a vegnin fatis intai nestris confronts e che, ce che di simpri al ven denunziât tant che atac sistematic ae idee stesse di Friûl, al continue intrepit la sô azion di propagande. Magari che si tratàs dome di peraulis – pericolosis tant che sarpints, par altri – ma purtrop si trate di fats, ats e decisions politichis concretis. Se o analizìn i mês passâts, o podìn notâ cemût che aromai la concezion di un sôl centri dominant inte economie reâl de Regjon al vedi il non di Triest, o pes cundizions favorevulis che a son daûr a disvilupâsi ator dal puart, o pal centralisim esercitât in funzion di capitâl. Se o vin di simpri denunziât – e chel “simpri” al dîs che lis cundizions di partence no si son modificadis – il sbelançament dai podês a pro de citât juliane, no podìn no constatâ cemût che chest al risulti ancjemò plui rinfuarçât. Al bastarès pensâ ai fonts europeans che a son daûr a rivâ, par notâ la lôr destinazion favoride: e chest no – atenzion! – par une sorte di striament, ma pe presince di strategjiis futuris in stât di sigurâ il lôr ûs. Brâfs lôr, potis nô che si cjatìn cuntune classe politiche e imprenditoriâl buine dome di pensâ al so interès imediât, freantsi dal dut dai interès coletîfs.
✽✽ Ma par fâ passâ in mût indolôr cheste manovre, si à di butâ jù in maniere definitive il concet stes di Friûl, dineant la sô esistence, inagade intun brût regjonalist fat cul dât e no cu la cjar. E se di furlans si à di fevelâ, a van relegâts intal rûl di minorance, buine par jessi citade in maniere folcloriste, dismenteant che a rapresentin invezit la maiorance e che a produsin la grande part dal redit regjonâl.
✽✽ Dut chest si lu viôt clâr cu la campagne vergognose de zonte Fedriga sul teme “Io sono FVG”, acronim ofensîf pe storie e pe realtât dai fats. Un “logo” che al somee un nûl tossic che si slargje, a sun di contribûts, di Tarvis a Lignan, di Sacîl a Cormons, cjapant dentri lis nestris ecelencis, costretis a rinunziâ ae lôr origjinalitât identitarie.
✽✽ Cuant che duncje o fasìn un belanç, visìnsi di ce che si ripet in maniere puntuâl, di ce che al somee passât e invezit al torne a comparî, magari in forme divierse, ma cu la stesse sostance. E cjalìnsi daûr des spalis par no dismenteâlu, ma soredut par individuâ cui che di simpri a chescj plans no si opon, in non di une “coesistence pacifiche” che e mostre i limits di simpri.
✽✽ Intai agns ‘60, cun chest tiermin si usave a definî la prove di no beligjerance in at tra Americhe e Urss. Pecjât che intant i arsenâi si jemplassin di missii nucleârs e che al fos il Tierç Mont, i plui debii, a paiâ il presit.
E se vuê il Tierç Mont o fossin nô? ❚