✽✽ O soi stuf di sintîmi a dî che i furlans no àn cussience di jessi un popul. Cun cheste scuse si justifiche ogni batude, piçule o grande, che e da a cui che al va cuintri dai interès de nestre tiere une specie di onipotence malscuindude.
✽✽ Al vâl compagn par ducj chei che – ogni volte che in Consei regjonâl e passe une leç che e favorìs interès triestins cuintri dai nestris – a ripetin che la maiorance dai conseîrs e je furlane. Si à di dîlu cun fuarce: cui che al è stât elet cui partîts talians al rapresente i interès di chês segretariis, romanis o milanesis. Che a sedin nassûts a Cerneglons
– e al displâs par Cerneglons – o che a fevelin in marilenghe, che a mostrin distintîfs cu la acuile patriarchine, al impuarte pôc par no dî gran, devant de lôr ubidience assolude e vuarbe aes diretivis dal centri.
✽✽ Ma o soi ancje stuf dai leons di tastiere, o ben di chei che no son mai contents, di chei che a son critics ancje lis pocjis voltis che si vinç, che al somee che no vuelin rindisi cont che la lote dal popul furlan no je un zûc di societât, un bla bla tra intims – simpri chei, par altri – e nancje no je une ostarie indulà memoreâ i timps di aur dal autonomisim, sentâts te taule di une nostalgjie inutile.
Par chescj veterans, il rimiedi al è inte frase “Al volarès simpri cualchidun o alc che vuê nol è”.
✽✽ “Spietant Godot”, lu àn voltât ancje par furlan.
E chei altris, tancj e simpri di plui, si ridin, a van indenant in maniere inesorabile cu la distruzion de nestre identitât, convincint cu la fuarce dal ricat, dispès economic, a rinunziâ a ogni visibilitât di cheste nestre muse, come se e fos alc di vecjo, di provinciâl, a pet des sortis magnifichis de globalizazion.
✽✽ Masse di lôr, cuant che no si rindin cont, a deventin marionetis intes lôr mans; a son compliçs se a son cussients des lôr azions, des lôr peraulis, e dal efiet deleteri che a produsin intal sintî popolâr.
✽✽ Se duncje o disìn vonde a chestis Cassandris, cun ancjetante convinzion o vin di savê trop impuartant e vitâl che al sedi, in moments come chescj, l’impegn personâl di ognidun, di cui che, devant des falsis visions, dal stravuelziment de veretât – chê storiche prin di dut, ma vuê ancje di chê economiche, politiche e istituzionâl – al sint ancjemò il dovê di alçâ la man e di dî NO.
✽✽ E no je une cuistion di numars, di trops che o sarìn: e je une cuistion di dignitât. ❚