Savêso di dulà che al jere il prin muart sul front talian de Prime vuere mondiâl? Ducj par solit si visin dal alpin Ricart Giusto, di Udin, ma ancje il prin copât di bande austriache al fo un furlan, il cogo dal esercit austriac Eugjeni Sandrigo, che al jere di Aquilee.
◆ Ma ancje se Aquilee in chê volte e jere Imperi, pes celebrazions dai 100 agns de sielte dal “Milite Ignoto” e je stade tal centri di une retoriche nazionalistiche taliane cence brenis: pardabon un pataf ae nestre storie, e ae memorie di un conflit che pai furlans no varès di jessi une vitorie di celebrâ ma un ricuart teribil. Chel di un maçalizi che al à viodût i furlans scombati tant che “fradis cuintri fradis”, di une bande e di chê altre dal confin.
◆ Intes cerimoniis uficiâls nus à tocjât di sintî a fevelâ di int muarte in vuere inte “difese dal sacri teren de Italie”, cuant che il Ream dai Savoia, lu san ducj, al jere stât lui a atacâ. E la storie dal “soldât discognossût” e je stade doprade fin dal prin moment par consolidâ il mît de “Vitorie Mutilade”. Chel che al à proponude la leç di istituzion de cerimonie dal Milite Ignoto, l’onorevul De Vecchi (ferbint membri dal Fassio), al à creât un simbul di identificazion de Patrie taliane che daurman al meteve sot dai pîts la identitât e la specificitât di chê Patrie dal Friûl che Rome e à simpri cirût di distudâ.
◆ Invezit Aquilee e la sô Basiliche a son stadis par secui tal centri di une Patrie ecumeniche plurilengâl che e maridave insiemi plui etniis e culturis. Cumò, par batiâle “scune di italianitât” a son rivadis ancje lis Frecis Tricolôr a svolâi parsore e, dopo de Love di Rome che e ruvine di agnorums la place, al è stât tirât sù ancje un cartelon che al fâs stomi e che al sune pardabon tant che un insult pe storie. Aquilee e sarès mari di chei che a àn lotât pe Patrie taliane, pareli a chê Marie Bergamas che culì e à sielzût il cuarp di puartâ a Rome al Vitorian sul Altâr de Patrie. Ae storie di cheste mari chei de Rai i àn ancje dedicât un biel film: e i furlans, contents. “Âstu viodût il film sul Milite Ignoto? Finalmentri a mostrin Aquilee!”.
◆ Chei de Rai, salacor, se a volessin contâ pardabon dut ce che e je stade la Vuere Grande, a varessin cetantis storiis chenti par fâ films. Cuant si fasaraie une pelicule su lis puartadoris cjargnelis, o sui fusilâts di Çurçuvint che ancjemò a son considerâts tant che criminâi dal Stât talian che ur domandave di murî dibant? Cuant rindaraial omaç a chei puars soldâts il president de Republiche? Cuant rivaraial un ricognossiment public pai “fassinârs” di Vilès, copâts par une falope di un uficiâl talian? Cuant si contaraie cuntune senegjature la storie de Brigade Catanzaro, che e ve fusilâts 28 soldâts cence nissun procès, cualchidun adiriture sielzût cu la forme dal sisteme di gjavâ a sorte chel che al veve di jessi maçât?
◆ Chel moment al è lontan. Par cumò nus reste Aquilee mari, umiliade di une retoriche che e fâs mâl plui des sclopetadis, e il sium di une Patrie che no je dal sigûr chê che par justificâ il so nazionalisim e à bisugne di vignî achì a falsificâ la nestre storie. ❚