L’inovâl de Transiberiane, ferovie “furlane”. «Mi faresti un favore a spedirmi la Patria del Friuli»: Checo Concine, furlan di Siberie | Felix Marchi: la svee de cussience in Mançurie

100 agns za fa, tal Otubar dal 1916, si finive la Transiberiane, la ferade plui lungje dal mont. In tancj furlans a larin a lavorâ di chês bandis, e tancj a restarin la: une storie che si cognos pôc. Ve chi une des tantis…
Letaris scritis di Tomsk tal 1894: doi sfueuts sgramaticâts, plens di une poesie che si jemple di nostalgjie pe cjase lontane, pe femine restade di bessole, cun dut il marum che al nas di une distance infinide. Lis cjartis nus fevelin di une vite durissime, tal cûr de Siberie, a Tomsk, là che i nestris operaris, scarpelins, tieraçadôrs, muredôrs, e tirarin su i ultins grops di vie ferade che e tacave Moscje a Vladivostok e che si saressin unîts cualchi an dopo a Irkutzk, sul lât Baykal. Ce che si rive a lei sot dai segns di chel pinel balarin e tindint a pandi maglis sul sfuei nus permet di jentrâ dentri di une izba di len, cul cuviert di tiere. Nuie di sest di bevi, pôc ce mangjà. Si rive cuasi a nasâlu, il savôr de fadie, le puce de disperazion.
Chel che al scrîf si clame Checo Concine, origjinari di Sant Denêl. E il so cûr, a distance di plui di cent agns, nus trasmet chel sens di sospension che ti nas dentri cuant che no tu sâs nuie dal to ben, restat lontan. E dì par dì tu sparagnis cualchi monede, i rublis, sacrificant la vite, le zovinece, la salût pe sperance di podê gjoldi, une dì, une vite plui umane in Friûl, se Diu al vûl. Epûr al reste vivarôs ancje il sens dal stupôr e de maravee par une aventure uniche e grande, che si capìs jessi iripetibile, in te panze di une Nature mostruose, ma ancje bielone, strambe come chei oms e chei animai che a rivin adore a glotile e che la abitin in chês tieris lontanis, cuviertis di glace pe plui part dal an e trasformadis in palût e moscjins in te stagjon curte dal Istât. E la voie di contâle e je grande. Almancul tant che la premure di vê gnovis di cjase: i amîs, il timp, il paîs.
Di bon furlan, cu le anime ancjemò contadine, Checo al domande il presint dal forment. Al pree di vê notiziis de Mari e de Madone. Guai se cualchidun si aprofite di chê zovine lassade di bessole, a viodi dai fruts. I conte di jessi obleât a meti su vistîts di piel e corean che a son plens di pedoi e di pulçs che no rivin a murì nancje tal frêt plui glaçât dal mont: e al conte dut ce che al scuen patî dome par rivà in lusimpon: «abiamo avuto il giello alla barba 10 centimetri longi […]e in tanti posti si trovava solo che pan negro e tuto ingiellato».
Ma forsit plui che il frêt i da fastidi alc altri: «così entro il viagio non ho potuto veder un bichier di bira» Bisugne vierzi lis pagjinis cun cure, par pôre che si sfantin. Ma soredut pal rispiet che o vin di dâi a oms come Checo: «quel poco denaro che mi resta è tanto sangue». E il Friûl? Cemût ise la nestre int? Ce si contial li di voaltris? Domandis che di lontan a dovintin plui profondis de Taigà: «poi tu mi farai sapere quanto foragio che tu hai in Pozalis, e se tu hai tornato a recuperar la capara, e poi tuto fami sapere dei nostri afari di casa e dele novità, e il prezo della biava, che qui non abiamo nessuna notizia. Mi faresti un favore a spedirmi la Patria del Friuli».
Isal pussibil no comovisi? ❚
✒ Agnul Floramo
___________________________________
Felix Marchi: la svee de cussience in Mançurie
Fra i tancj furlans lâts a vore in Russie pe Transiberiane al jere ancje il fondadôr dal nestri gjornâl Felix Marchi. Al fo propit li che Marchi al madurì ad implen lis sôs convinzions furlanistis, cuant che al faseve il gjavedincj in Mançurie, framieç dai operaris impegnâts tal sprolungjament de ferade. Al è ce che si pues capî di un so scrit publicât su la Patrie dal Friûl tal 1946, dulà che si conte di une discussion sul Friûl, l’ultin dal an dal 1921, cuntun trop di operaris furlans che a lavorin là vie e che là vie a àn feminis e fruts di colôrs diferents. ❚
✒ A.F.