L’impegn di une racuelte di firmis par sostignî une leç par un fisc ecui e solidâl

La CISL Nazionâl e à promovût la racuelte di firmis a poie di une “leç di iniziative popolâr” par un fisc ecui e just.
La Segretarie de CISL di Udin e à sielt di impegnâsi in cheste iniziative no tant e no dome intai lûcs di lavôr ma e à vût miôr lâ fûr des fabrichis e dai uficis par lâ a cjatâ i citadins furlans intes placis dal nestri teritori.
La CISL e à organizât intai mês passâts desenis di presidis in concomitance cul davuelziment dai marcjâts tradizionâi che si tegnin in tancj paîs dal nestri Friûl.
LIS ADESIONS E IL DIALIC
La CISL, cussì, e à podût no dome racuei ben 2.400 firmis in gracie ancje dai conseîrs e assessôrs comunâi che si son fats disponibii, ma soredut e à podût informâ e dialogâ cun personis che par abitudin no àn nuie a ce fâ cul moviment sindicâl.
L’impegn de CISL suntune cuistion vecje e impuartante come chê fiscâl al à cjatât un gradiment sclet, ancje se no son mancjadis critichis e moments di discussion vive.
Al è just e normâl, dal rest, che il sindicât al stedi tal mieç de int e che al vivi in prime persone lis soferencis, lis inrabiaduris, e che indi patissi i relatîfs bruts umôrs.
Ve, in sintesi, i obietîfs de iniziative.
Al va introdusût un bonus fiscâl di 1.000 euros anuâi pai contribuents cun redit fin a 40.000/€, e un bonus decressint fin ai 50.000/€.
RINFUARÇÂ LIS SANZIONS
A van rinfuarçadis lis sanzions aministrativis e penâls, cressûts i controi, e va introdusude la segnabilitât dai paiaments e l’ûs des cjartis di credit par contrastâ pardabon la evasion fiscâl. Al è indispensabil che al aument de fiscalitât locâl e corispuindi une riduzion dal prelêf fiscâl nazionâl!
E je urgjence di une impueste cressinte su la ricjece nete di là dai 500mil euros, cu la esclusion de prime cjase di abitazion e dai Titui di Stât.
POIE A CONSUMS E LAVÔR
In definitive, par fâ tornâ a partî la economie a van sostignûts i consums e il lavôr cuntune grande operazion redistributive di ricjece che e favorissi i lavoradôrs e i pensionâts, soredut di redit medi bas, e che, invezit, e fasi paiâ plui tassis ae rendite mobiliâr e imobiliâr.
La Italie e je une Republiche. Rifondìnle sul lavôr! Tacant di un fisc che al premi cui che al cree ricjece, che al sedi chest lavoradôr dipendent, autonom, o altri.
Il nestri Friûl al è di simpri fondât su la onestât dal lavôr e no su la furbetât des speculazions e des jentradis. Tornìn a partî di chi. ❚
Paolo Mason, Segretari CISL di Udin