Ae nestre regjon la maie nere dal Nordest talian pe pierdite di ocupazion: e intant a scjampin i cerviei cuntun nivel di istruzion medi o alt
A son stâts centenârs i pignarûi ator pal Friûl che cu lis lôr flamis a àn dât il vie al an gnûf. Plui che bacilâ pes emissions di CO2, dut câs, al sarès di preocupâsi pe cinise lassade di dutis lis impresis finidis in fum e pai puescj di lavôr lâts sù pai stecs vie pal 2019. Se si fevele di ocupazion, di fat, la situazion no je par nuie consolante, viodût che lis statistichis dal Istat (dâts fin a Setembar dal 2019) i àn dade ae nestre regjon la maie nere dal nordest talian (pierdite di 1.300 lavoradôrs tal zîr dai prins 9 mês dal an), indulà che, invezit, si regjistre un andament positîf. Piês di nô, dome la Sicilie, la Campanie e la Calabrie. Al fâs pensâ, impen di consolâ, che Triest e sedi stade la uniche provincie di Italie cuntune cressite ocupazionâl intai ultins 10 agns. In chestis cundizions, buine part de mularie furlane no je dal sigûr stade cu lis mans in sachete a spietâ lis sentencis dai strolics, ma e je lade pal mont, ancje se ben furnide di trolley al puest dal sac o de valîs di carton.
A cjapâ il svol, dut câs, no son dome chei des zonis plui disvantazadis, tant che la mont (indulà che no si rive inmò a disfrutâ lis potenzialitâts turistichis), dal moment che a emigrâ a son i zovins di dute la regjon, massime chei cuntun nivel di istruzion medi o alt. “An nôf vita vecja”, in sumis, par doprâ lis peraulis dal poete de emigrazion Leo Zanier, cui fîs che a àn di “imparâ a fâ la valîs encja lôr”, tant che i paris e i nonos. Ancje par chel che al inten chest fenomen, tal 2019 si sin “meretâts” il prin puest in Italie, devant di Trentin Sud Tirôl e di Val di Aoste. Stant a un studi di Cantiere Friuli par cure dal professôr Gian Pietro Zaccomer (Oficine Demografie e Teritori), i iscrits ae Universitât dal Friûl a tachin a scjassâ lis alis ancjemò prime di rivâ ae lauree: tancj lu fasin pal gust di provâ esperiencis gnovis; scuasit il 20%, invezit, si prepare a fâ Sant Martin par cirî un lavôr adeguât al titul di studi. Jenfri lis destinazions plui bramadis, il Ream Unît e la Irlande (un intervistât su doi), Stâts Unîts di Americhe, Canadà e Gjermanie. La circolazion di cerviei no sarès un mâl, di par se, se la emigrazion dai nestris zovins e fos temporanie e compagnade di une imigrazion di altris cjâfs (che e mancje). Il probleme che o sin daûr a vivi e je la mancjance di atrat des ufiertis no dome dai percors universitaris, ma soredut dal sisteme produtîf regjonâl e statâl, che nol è avonde disvilupât rispiet al nivel di formazion dai nestris zovins (miss match). Par fâur cambiâ idee a chescj cerviei che a scjampin (brain drain), bisugnarès duncje invistî di plui (e cun indurance) in istruzion, ricercje e disvilup.
La realtât su la zoventût furlane, dut câs, e je plui ingredeade. Tancj laureâts che a decidin di restâ (o che no àn la pussibilitât di lâ vie) a scuegnin adatâsi a fâ lavôrs che no ur smechin o pûr a vegnin paiâts un blanc e un neri, cun contrats che no garantissin nissun avignî. Al è pôc ce criticâ il fat che i fantats no si decidin a lassâ il nît dai gjenitôrs, cuant che i bêçs a bastin a pene pe benzine. La situazion no je miôr par chei che a fermin di studiâ prime e che si cjatin a mandâ CV ator pardut tant che cercandui. E se e je vere che a esistin ancje i lavôrs “sporcs”, che nissun al vûl plui fâ (baste viodi lis musis di saldadôrs, cjarpentîrs o ancje manoâi par capî che di zovins e di furlans a ‘nd è ben pôcs), il slargjâsi de crisi in chescj setôrs al somee un motîf in plui par tignîsi inmò plui lontans. Par prionte, il “fasìn di bessôi” nol pâr une formule di atrat pe mularie, viodût che la nestre regjon e je ultime inte classifiche taliane par presince di impresis di zovins. Une esitance che forsit no je peade ae mancjance di sgrimie, ma che e va cirude tai mil berdeis de burocrazie. Inalore, stant che ogni bon fantat furlan al à tal DNA chel gjen che lu sburte a no restâ mai cu lis mans in man, nol reste che lâ tal forest, cu la sperance di un avignî plui dignitôs e cu la cussience che “emigrant / al deventa il so mistîr / e al impara ch’a nol va par vivi / ma par no murî”. ❚
