Il centralisim talian al è aromai cence brenis, e se la autonomie des Regjons talianis e riscje di inneâsi, chê dal Friûl e je za in muel. Par chest fâ cressi une gnove gjernazie di autonomiscj furlans, che e cjali il teritori cuntun voli preparât e concret, no pues jessi plui dome une ambizion, ma e devente une necessitât. E je cheste la idee di fonde vignude fûr des Lezions di autonomie che la associazion La Grame e il Laboratori nassût di 16 aministrazions comunâls a àn puartât indevant par dut il mês di Otubar.
La fuarce de formule screade l’an passât e je chê di tamesâ in tantis direzions il concet di autonomie intal so peâsi a dutis lis dimensions dal vivi sociâl dal popul furlan: de storie ae politiche, de economie ae Glesie, de culture ae societât. E ancje in chest secont cicli, la operazion e je rivade a dismovi riflessions che no sunin masse consolantis, ma che a coventin a tignî fer il nestri spazi identitari.
PRIN INCUINTRI
CAVALLO: «A COVENTIN IMPRESCJ GNÛFS DI GUVIER DAL TERITORI»
L’autonomist storic Giorgio Cavallo lu à dit clâr: il Friûl al à bisugne di imprescj gnûfs di guvier dal teritori e di une plui fuarte autonomie finanziarie par frontâ i gnûfs gredeis de globalizazion, ma cence un fuart pat sociâl che al ledi a rivendicâ une autonomie diferente, no si larà di nissune bande. In ce maniere il Friûl puedial pensâ di tornâ a contâ alc? Se si tratàs dome di nomenclature politiche, sedi a man çampe che a man drete il Friûl nol à mai vût tancj puescj inte stanzie dai botons: e invezit la specialitât no je mai stade cussì a risi. Par fâ capî che in cheste zone i centraliscj “no passaran”, al covente intivâsi par recuperâ la sovranitât sui bens primaris, aghe e energjie.
SECONT INCUINTRI
BRAÙRE IDENTITARIE LONTANONE
Lontane, lontanissime e je la situazion di braùre identitarie de Catalogne che William Cisilino, diretôr de ARLeF, al à presentât intune interessante comparazion cul Friûl. Che e mostre un paradòs: intant che i catalans a bramin la indipendence, no o riscjìn di jessi glotûts de Macroregjon che clamin “trivenite”.
TIERÇ INCUINTRI
INTE ECONOMIE, VALORIZÂ GJENUINITÂT E INOVAZION
Il rapuart cul Stât centrâl nol è dut câs l’unic probleme dal autonomisim che za di timp si è distacât dal cuarp storic dal Friûl e al è stât simpri plui dismenteât di Pordenon e di Gurize. Se un moviment identitari al varà di tornâ a nassi, al varà di tornâ a tirâ dongje chescj teritoris e la lôr int, dant al Friûl une prospetive gnove. Dificile di cjatâ, come che al à spiegât l’economist Flavio Pressacco inte sô relazion, che e à peât il sintiment di autonomie ae individuazion di un troi di disvilup economic: “al covente valorizâ la economie locâl no cirint di competi in tiermins cuantitatîfs cul forest, ma sburtant su la gjenuinitât de nestre agriculture buine e nete e su la vocazion inovative di tancj imprenditôrs furlans, zovins o no che a sedin”.
CUART INCUINTRI
LA GLESIE, UNE SPERANCE PAL AUTONOMISIM?
Une sperance dut câs e ven dal fat che la Glesie e je daûr a riscuvierzi chê vocazion autonomiste che inte sô storie e je stade fuarte e sclete, al pont che la Mozion dai Predis dal 1967 e fo rivoluzionarie pal Friûl come lis tesis de Sorbone lu forin pal ’68 francês. Bonsignôr Guido Genero, inte sô relazion aes Lezions di Autonomie, al à sclarît che la Diocesi e je pronte a clamâ dongje i Stâts Gjenerâi dai Furlans che a varessin di scomençâ a meti in pîts i resonaments che al covente fâ ducj insiemi par fâ cressi il Friûl di doman. Za 500 invîts a son pronts par inmaneâ chest gnûf percors di rialfabetizazion de nestre cussience identitarie e dal nestri sens di comunitât.
CUINT INCUINTRI
IL “THINK TANK” AUTONOMIST
E ancje il mont de culture e de politiche, des professions e de comunicazion al varès di dâsi dongje secont Federico Rossi, che al à sierât il cicli des lezions lant a stiçâ la necessitât di costituî une Farie des Ideis, un “think tank” permanent par rimodulâ la nestre concezion di autonomie daûr dai cambiaments simpri plui svelts de globalizazion.
BATAIIS SU SCUELE, CREDIT, ENERGJIE E AGHE
La prime bataie e je la competence su la scuele: e su chest si è za dât di fâ in maniere concrete il trop di sindics che al à costituît il Pat pe Autonomie. Ae fin di Novembar di fat il grup vuidât di Massimo Moretuzzo al à scomençât la sô ativitât publiche cuntune cunvigne par rivendicâ la competence primarie in materie di istruzion: e altris iniziativis a nassaran tai mês che a vignaran su temis tant che la riforme des bancjis di credit cooperatîf, che e riscje di svuedâ la ultime musine dulà che i furlans a tegnin i lôr bêçs cuntune minime sperance che a tornin a jessi invistîts sul teritori. E soredut su risorsis come energjie e aghe: par cheste ultime, la creazion di un ambit regjonâl che al meti dongje gjestion idriche e racuelte des scovacis e sarès un un vêr invît a gnocis par grancj grups multiservizis talians e forescj. Ma un funerâl par chel fregul di capacitât che ancjemò e reste di podê decidi a cjase nestre. ❚
Walter Tomada
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +
La rassegne / Avostanis 2023, un viaç a scuvierzi ce che al reste de sacralitât
A son 32 agns che i Colonos a rindin l’Istât furlan un laboratori di sperimentazion creative e di riflession cence confins. Intal curtîl dal vecjo complès colonic di Vilecjaze, “Avostanis” e je deventade une rassegne che no si pues mancjâ par capî ce che si messede inte culture contemporanie no dome di chenti: culì a […] lei di plui +
Int di Cjargne / Magjie a Cjarsovalas
Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +
L’Editoriâl / Cuant vignaraie la “adunade” dai furlans?
Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +
Festival di Poesie Alpine / Autôrs di Ladinie, Grisons e Friûl a confront
Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +