Sfuei Mensîl Furlan Indipendent
Archivi de Patrie

LETARIS – Erois

............

Presentant il Speciâl – Erois furlans o vin cjapât spont de atualitâ publicant un comunicât stampe che al diseve cussì:
La Patrie dai erois furlans
Ta chescj dîs e ten banc su lis pagjinis de cronache locâl la iniziative di Gianfranco D’Aronco, Bruno Vidal e Ottorino Burelli che, intune letare vierte scrite al Sindic di Udin, a domandin a Furio Honsell di gjavâ il non di Place Cadorna e intitulâle ai miârs di soldâts muarts te vuere mondiâl (o miôr: mandâts a murî propit par cause di chest gjenerâl).
La liste des placis e des viis intituladis a nons de talianitât e de propagande di une cierte fate e je une vore lungje chi in Friûl. Se cualchi aministrazion comunâl, comprindude chê di Udin, e volès gambiâ cheste ande e tacâ a fâ intitulazions a personaçs eroics de nestre tiere, cuasi simpri platâts ma che a son, a podaràn cjapâ ispirazion dal numar di Avrîl de riviste «La Patrie dal Friûl» e dal so «speciâl erois furlans», che al sarà presentât in anteprime ai 4 di Avrîl a Buie inte Sale esposizions dal museu de art de medaie, a lis 16.30 in ocasion des iniziativis pe Fieste dal Friûl.
In rispueste a chest comunicât o vin ricevude une mail PAR TALIAN che us riproponìn te nestre lenghe e la relative rispueste.
Pûr condividint la iniziative indreçade a valorizâ la memorie dai tancj erois furlans dismenteâts, o pant la mê contrarietât a la propueste di gjavâ in non di place Cadorna, par altri motivade cuntun esam storic di ce che al à fat il gjenerât pluitost aprossimatîf e faziôs. I soldâts, par altri, no son obleâts a combati (e magari cussì no a murî) par volontât di un gjenerâl, ma daûr des leçs dal Stât (di ogni stât, no dal sigûr dome di chel talian). Duncje o invidi a valutâ cun plui atenzion prime di judicâ figuris di rilêf storic.
MARCO PASCOLI
O FASÌN RISPUINDIN AE LETARE SANDRI CARROZZO, AUTÔR DI UN DAI ARTICUI DAL NESTRI «SPECIÂL EROIS FURLANS»:
Cjâr Marco Pascoli,
dal sigûr il gjen. Cadorna nol è stât la cause di ducj i mâi de prime vuere mondiâl, ma se si à voie di gjavâi lis responsabilitâts negativis che al à vût (e un gjenerâl che si rispieti al scuen cjapâsi sù dutis lis responsabilitâts, robe che Cadorna, propit tai moments plui critics, al à refudât di fâ) alore, par simetrie e coretece, si varès di gjavâi ancje chês positivis che lu fasin deventâ une figure di «rilêf storic». Par altri il fat di vê il titul di une strade o di une place nol vâl par dutis lis figuris di rilêf storic, se di no o varessin di spesseâ a dedicâ stradis a Adolf Hitler, Benito Mussolini, Francisco Franco, Iosif Stalin, Pol Pot o altris figuris dal sigûr impuartantis pe storie umane, ma che no si sintìn di condividi come simbui positîfs. E al è propit chest valôr simbolic positîf che al è discriminant: no jerie magari aprossimade e faziose la decision di dâi a Cadorna il titul di une place? In non di ce si aial fat une sielte dal gjenar? In non dal militarisim plui barbar paiât prin di dut dai soldâts, dal nazionalisim e dal fassisim che a àn insanganât la Europe, de propagande inumane che e trasforme lis vitimis dal podê in martars e erois, par justificâsi, alimentâsi e preparâ gnovis gjenerazions di vitimis sacrificâls: cjâr Marco Pascoli, magari in maniere aprossimative e faziose, ma noaltris, in cussience, no si sintìn di condividi chescj valôrs.

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +