Il prin di Març a son stadis lis elezions par rignuvî il Parlament de Galizie e dai Paîs Bascs. Dut il procès, de campagne ae interpretazion dai risultâts, aes manovris pe formazion dal guvier basc, si è davuelzût fondamentalmentri in clâf spagnole (e nazionaliste spagnole), inte suaze de lote tra il Partît Popolâr e il Partît Socialist: la gjestion economiche dai socialiscj e la politiche di aleancis di Zapatero cui partîts nazionaliscj «periferics», la politiche antiterorisim, la difese de «spagnoletât», e v.i.
CUSSÌ IN GALIZIE_ In Galizie, la pierdite di un deputât dal Bloc Nazionalist Galizian e à impedît la riedizion dal bipartît Partît Socialist – BNG, e il PP al à recuperât il guvier cu la maiorance assolude. Lis primis vitimis de sconfite a son stâts i cjâfs dai partîts che a àn pierdût, che no son stâts bogns di meti in vore avonde svelts lis promessis di cambiament, sedi par vie de oposizion di cualchi agjent economic e mediatic, sedi par vie de inerzie di une aministrazion che par tancj agns e je stade tes mans dal PP, o pe imagjin une vore brute de gjestion di cualchi comun governât dal bipartît. Pal president dal PP, il galizian Rajoy, lis elezions de Galizie a son stadis un stamp di primariis dal PP par eliminâ lis vôs che lu metevin in cuistion, e si è impegnât une vore, cun dutis lis risorsis pussibilis. La vitorie lu à infuarcît tant che leader, e al viôt che la strade par rivâ ae presidence dal guvier spagnûl no je fûr di man, cumò che i à fat gloti la prime sconfite al partît di Zapatero. La politiche linguistiche galiziane no pues jessi il prin obietîf de gnove aministrazion che si môf cun parametris mentâi plui di Madrid che de Galizie. Cuissà se a vaiaran i guviers popolârs di Manuel Fraga, no cate il so passât tant che ministri di Franco.
CUSSÌ IN EUSKADI_ Tai Paîs Bascs, i schiriaments si son clarementri formâts sul as nazionâl: nazionaliscj bascs e nazionaliscj spagnûi (clamâts «costituzionaliscj»). L’obietîf di socialiscj e popolârs al è stât chel di parâ vie il Partît Nazionalist Basc dal podê (cun EA e i neo comuniscj di EB tal tripartît basc). Daspò i ultins negoziâts falîts cu la ETA e cui scandais in man, la strategjie dai costituzionaliscj si è fondade te ilegalizazion dai partîts e des plateformis eletorâls de çampe radicâl, di mût di no rivâ a une riedizion de maiorance baschiste tal Parlament. Si à di visâ che chestis ilegalizazions a son stadis pussibilis in gracie de leç sui partîts politics, fate buine tal 2002 te Cjamare Spagnole dal PSOE, dal PP, de Coalizion des Canariis e, in maniere sorprendente, de catalaniste Convergjence e Union. In chest contest si pues fevelâ di alterazion des regulis de democrazie, par vie che cheste leç no je mai stade aplicade ai partîts de diestre estreme spagnole, che a son violents, raziscj, o che a difindin lis ditaturis.
La çampe indipendentiste e à domandât di anulâ il vôt in segn di proteste pes ilegalizazions. Cui vôts valits, si pues speculâ che a varessin vût siet deputâts. Chescj vôts, che no son stâts dâts a partîts cun afinitât nazionâl (PNB e EA), a àn permetût che al cressès il pês dai socialiscj e dai popolârs e che e jentràs tal Parlament la neo spagnoliste UPyD. I otims risultâts di Aralar, formazion indipendentiste che e condane la violence de ETA, no son stâts bogns di evitâ che il front spagnolist al ves la maiorance assolude, in gracie ancje de particolâr leç eletorâl basche.
MATRIMONIS DI INTERÈS_ I contats posteriôrs pe formazion dal guvier a àn metût in lûs in maniere clare il matrimoni di convenience tra i partîts spagnûi principâi par permeti la espulsion dai baschiscj, un pat che al sarès dal dut impensabil in altris contescj, cjalant la lote continue che e srarìs la politiche spagnole. Par altri, si à ancje di stâ atents ai contats pussibii tra i socialiscj e i indipendentiscj ilegalizâts. Fûr pe campagne eletorâl, la ETA no à copât, no cate la evidente ostilitât rapresentade dal fat che lis formazions similârs no podessin concori aes elezions. Alc di insolit che, in zonte aes insistencis dal vôt no valit, al palese che la ETA e à chê di lassâ aes spalis il periodi dal president Ibarretxe che nol è rivât a fâ prosperâ nissune propueste valide par stramontâ il sisteme des autonomiis, stranementri par colpe dal refût di chei che la ETA e dialoghe cun lôr.
ZAPATERO IN DIFICOLTÂT?_ I risultâts di chestis elezions a àn fat pierdi a Zapatero lis aleancis parlamentârs a Madrid di galiziscj e di baschiscj. Se si considere che il catalanisim nol à masse chê di judâ un president che plui viaçs al à imbroiade la Catalogne, la situazion e je complicade. In chest contest, si pues capî la propueste dal Consei di Stât di modificâ la leç eletorâl in Spagne, di mût che i partîts spagnûi principâi no dipendin dai nazionaliscj no spagnûi par formâ maiorancis parlamentârs.
Josep-Enric Teixidó
Sindic jo mame / “La nestre int no à mai molât. Covente fâ, no lamentâsi, par saltâ fûr dal pantan”
Walter Tomada
Alessandro Marangoni: la Aclif e deventarà istituzion di riferiment pai furlans “La Assemblee dai sindics furlans e je une realtât necessarie. E cul timp e deventarà ancjemò di plui un pont di riferiment pe identitât de nestre int”. Al è sigûr di chest Alessandro Marangoni, prin citadin di Dartigne, che al crôt tant inte Aclif […] lei di plui +
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
Ricorence / Pier Pauli Pasolini om contraditori e segnâl di contradizion
Pre Toni Beline
Tal centenari de muart di Pier Pauli Pasolini o ripuartìn a tocs la tierce part dal libri scrit di Antoni Beline tal 1993 ‘Trilogjie tormentade’, che e rivuarde propit il poete di Cjasarse I. RISPIETÂ IL MISTERI DAL OMLa sience plui dificile e je la cognossince di se stes. E se al è grivi cognossi […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +