Letare dal President de Provincie di Udin

Dopo di vê sostignude la publicazion, cumò la Provincie di Udin e je impegnade te spedizion de Opera Omnia di pre Antoni Beline a dutis lis bibliotechis dal Friûl.
Sîs agns indaûr il Friûl al pierdeve un dai siei plui grancj inteletuâi, pre Toni Beline. Dopo de sô muart, la Provincie di Udin e Glesie furlane a decidevin di acuardâsi par inviâ un progjet che al contribuìs a no dispierdi il grant patrimoni leterari che nus à lassât il grant scritôr. A chest fin al vignì predisponût un protocol di intese jenfri la aministrazion provinciâl e la associazion Glesie furlane pe publicazion de Opera omnia di pre Beline: la Provincie, in particolâr, si impegnà a finanziâ la ristampe di cetantis oparis. Il nestri obietîf, cumò come in chê volte, al è chel di favorî lis azions di promozion e valorizazion de lenghe e de culture furlane. E propri in chest contest si insede il progjet pe publicazion dai tescj di grande cualitât di un dai plui grancj esponents de leterature furlane. Cun l’acuardi, dopo, no dome l’impegn a ristampâ ma ancje a difondi lis oparis di pre Beline tes bibliotechis dal Friûl storic. A chestis l’invît a meti in mostre chescj volums par solecitâ i furlans ae leture. La convenzion, de durade di cinc agns, e je rivade duncje al so moment plui impuartant ven a stâi chel de difusion dai tescj. La mê sperance e je che i principâi fruitôrs dal patrimoni leterari che nus à lassât pre Beline a podedin jessi i zovins, si trate di fat di une grande oportunitât par insiorâ il propri bagai culturâl. O volarès ricuardâ infin ce che chest savi plevan al diseve dal so Friûl: “O vin di promovi la idee di un Friûl che nol cîr di salvâsi a ducj i coscj de modernitât, ma che al sa frontâ e confrontâsi ancje cu la globalitât. Tignìn a ments che la globalitât cence il localisim e je une scjatule vueide. Cussì come l’inglês cence lis lenghis e lis culturis locâls”. ❚
✒ Pietro Fontanini
President de Provincie di Udin