Sfuei Mensîl Furlan Indipendent
Archivi de Patrie

SLOVENIE. La cuistion dal eletrodot “di là dal clap”

............

Intant che il guvier sloven al fâs fieste par vê disfantât il pericul de costruzion dal rigasificadôr a Zaule intal golf di Triest, no je passade inosservade inte Alte Val dal Lusinç (Posocˇje) e intes Vals dal Nadison la aprovazion di 248 progjets impuartants di infrastruturis energjetichis di interès comun (PIC). Ai 14 di Otubar passâts, di fat, la Comission europeane e à metude jù la liste des infrastruturis che a beneficiaran di proceduris aceleradis pe consegne des licencis e che a varan acès ae poie finanziarie che e ven dal “mecanisim par colegâ la Europe”, dotât di un stanziament di 5,85 miliarts di euros pal periodi 2014-2020. La Slovenie e je rivade a fâ meti inte liste siet siei progjets energjetics par un valôr di 1,2 miliarts di euros. A son i colegaments gas cu la Ongjarie (Kidricˇete – Lendava), cu la Cravuazie (Kalce – Jelšane), cu la Italie (Šempeter – Vodice), dal infuartiment de rêt interne Divacˇa-Klecˇe-Bericˇevo-Podlog-Cirkovce di 220 a 400 chilovolts, de costruzion dal cavodot di 500 chilovolts Salgareda – Divacˇa e dai colegaments eletroenergjetics cu la Ongjarie (Cirkovce – Pince) e cu la Italie (Okroglo-Udin). Chest ultin al varès di passâ la Alte val dal Lusinç e jentrâ in Italie traviers il pas di Solarje (su la mont Kolovrat), intal comun di Drencje.
Metût intal Plan energjetic nazionâl sloven dal 2011 (ma no ancjemò intal plan regoladôr nazionâl), l’eletrodot a alte tension (2x400kV) Okroglo (dongje Kranj) – Udin, al è font di discussions animadis za dal 2004. Za in Benecˇija come intal Posocˇje, il progjet dal eletrodot al à dismovût lis reazions negativis dai abitants dai teritoris interessâts, preocupâts dal impat visîf e ambientâl che al compuartarès la costruzion di cheste infrastruture (cun pilons alts plui di 60 metris traviers cjanâi avonde strents), e des incidencis sul turisim de zone. Setôr za avonde disvilupât inte val dal Lusinç e che al ufrìs lis pussibilitâts plui amplis di disvilup pes vals dal Nadison. La costruzion de opare e je previodude dut câs dentri dal 2020, par un invistiment di 65 milions di euros.
La Eles (la aziende energjetiche slovene che e gjestìs la rêt di trasmission intal paîs, l’omolic di Terna in Italie, sô compagne pe costruzion dal eletrodot Okroglo – Udin), e à esprimût invezit sodisfazion pal inseriment dai propris progjets inte liste dai PIC. Cemût che al à declarât il vicediretôr dal Ufici pe gjestion di risorsis e dai progjets de Eles Uroš Salobir intune note stampe aziendâl, chest al rapresente un altri stimul ai sfuarçs fats di Eles pe realizazion di un program di disvilup pal dopo 2020. Il program di disvilup de rêt di trasmission e je une part fondamentâl de energjetiche slovene, al à sotlineât Salobir, e al permet, par altri, la integrazion dal marcjât energjetic sloven cun chei de Europe centrâl e meridionâl. La partecipazion des istituzions europeanis ae atuazion dai progjets prioritaris de Eles, che a son prioritaris sedi dal pont di viste nazionâl che internazionâl, a permetaran l’otigniment dai obietîfs in mût plui zovevul – si lei inte note – e intal interès des comunitâts locâls, dai proprietaris dai terens e dai clients dal marcjât di energjie eletriche.
Ma propit chês che ur disin comunitâts locâls, che a denunziin ancje il fat di no jessi stadis interpeladis mai su la cuistion eletrodot, a son contrariis in maniere nete ae realizazion dal progjet. La “iniziative civîl” de Alte Val dal Lusinç, che di agns si bat cuintri la costruzion dal eletrodot (e che e colabore in maniere ative ancje cui opositôrs intes Vals dal Nadison e contors), dopo il benstâ de Comission Europeane, intun comunicât stampe e à motivât la proprie contrarietât al progjet, no dome dal pont di viste paisagjistic e ambientâl, ma ancje economic, sotlineant il pericul pal turisim intune aree, chê intor al Kolovrat, che, par altri, e je al centri di doi progjets europeans impuartants, tant che la Vie de Pâs e la Alpe Adria Trail. Par ce che al tocje l’aspiet plui leât a strent ae energjie, la iniziative de Alte Val dal Lusinç e fâs notâ cemût che la Slovenie e sedi colegade za in maniere adeguade cui paîs dongje e che il gnûf eletrodot al puartarès a un aument dal cost de energjie eletriche causât dai presits plui alts in vore in Italie. Cun di plui – a fasin notâ i opositôrs dal progjet – al contrari di ce che e sosten la Eles, l’eletrodot nol miorarès nancje il servizi di furnidure energjetiche inte Severna Primorska (Litorâl dal Nord). Al sarès bon pe Italie dulà che il sisteme energjetic al è penalizât de carence di colegaments adats intal sud dal Venit.
Il sindic di Tulmin Uroš Brežan al à interessât su la cuistion il Consei di Stât sloven che al è membri, otignint la sô poie. Il Consei di Stât duncje al à invidât il Guvier, il Ministeri des infrastruturis e dai traspuarts e l’Eles a studiâ la pussibilitât di colegaments energjetics alternatîfs tra la Slovenie e il Friûl – VJ che no vedin impats ambientâi cussì drastics e che no prejudichin il disvilup dal teritori. La aziende energjetiche slovene, cuntune note dai 24 di Otubar passâts, e à rispuindût che dopo vê studiât cun Terna diviers percors pussibii, a son rivâts ae conclusion che la soluzion otimâl e je chê che e passe pal Kolovrat. Lis comunitâts locâls e i sindics dai teritoris interessâts (sedi in Italie che in Slovenie) a prometin altris bataiis par fermâ l’“ecomostri”. Ancjemò une volte si assist ancje inte fasse confinarie dal Friûl ae contraposizion fra l’interès locâl e chel dai grups di interès e des aziendis coinvoltis inte realizazion dal progjet. Intes Vals dal Nadison e dal Lusinç si spere che il confront si concludi in maniere divierse di chê che o sin usâts a viodi. ❚
✒ Tjaša Gruden

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +