Sfuei Mensîl Furlan Indipendent
Archivi de Patrie

L’EDITORIÂL – Politiche e partîts. Cemût e parcè dâsi dongje?

............

Nol esist nissun furlanist, almancul che nol sedi lât fûr di scuare, che nol pensi che si varès di dâsi  dongje ducj chei che a crodin tal autonomisim. Al è un sintiment sberlât a fuart prime des elezions, soterât cuant che si à di fâ lis listis, cidin daspò vê let i risultâts, ma che al torne fûr passade la buriascjade e la delusion.
Viodût che, di sigûr in maniere divierse a seconde dal moment, e reste cheste convinzion, al sarès forsit il câs di cjapâ il probleme pai cuars e cence pôre di dâi fastidi a cualchidun, di rompi cualchi “Sante Aleance”.
Si à di premeti che par frontâ cheste cuestion, no si pues fâ di mancul di cjalâsi tai voi e di domandâsi, ogniun di nô, se o vin simpri tignût une muse politiche indreçade intune direzion dal gjenar o se dispès no sin stâts ancje noaltris, ogniun tal so specific e tal so personâl mût di compuartâsi, sassins di ogni pussibil acuardi.
Al è impuartant cjalâsi dentri, parcè che la sperance di unitât no je alc che al cole jù di cualchi bande o la spiete miraculose di cualchidun. E po cui? Un profete, un cjâfpopul, un leader carismatic, un cui bêçs?
Invezit, forsit propit cheste “sperance” e je stade la plui grande freolade pal moviment. Une sorte di malatie scomençade tal moment che, tal concret e no a peraulis, nol è plui esistût sul teritori un partît organizât come che al jere tal imprin il Moviment Friûl.
Tai agns ‘90, cul nassi de Leghe – che un leader massim lu veve a Milan e che achì e obleave i siei sergjents a une dure bataie pes poltronis istituzionâls, simpri di plui a disposizion – cundute la sô fuarce eletorâl, e je simpri restade un spazi che, di volte in volte, al è stât ocupât di cualchi sigle cun riferiment al autonomisim furlan. Si visaiso di Pedronetto e de Unione Friuli, cun doi conseîrs regjonâi, po dopo Pozzo? Vôts finîts, cence cjativerie, dome a meti dongje une biele pension.
Il nivel al è diferent, ma ancje Converzence cence Cecot ce ise, si no une sperance di gnûf che e reste tal scansel une volte che il sindic, che al à dut il dirit di fâlu, al torne a Triest e al so lavôr di sienziât?
Di chê altre bande Strassolt, ancje lui vitime dal so mût di intindi la politiche e l’autonomisim tant che individuazion te sô persone di dut il moviment.
Jo o crot fin tal ultin aes personis, e nol è un judizi su di lôr che al covente in chest moment ma une critiche a chel che o clami, pûr cun tant fastidi pai “isims”, leaderisim: par talian al sune ancjemò piês. Tra i siei dams al è un in particolâr che si tache ae cuestion de unitât: la gjelosie, il ripic.
O sin oms e feminis, duncje o sin sogjets ancje a chestis piçulis cragnis. Dome che, se chestis a produsin interferencis politichis, a deventin un afâr seri. Isal pussibil distrigâlis? O crôt di sì, se juste apont, lis decisions, lis sieltis no lis fâs une sole persone, ma se a son invezit il pinsîr madurît dutun di un grup. Un grup concret, reâl, no su la cjarte.
Par no restâ masse tal malsigûr e a cost di creâmi cualchi nemì, viodin alore cuale che e je la situazion dai grups furlaniscj.
Par chel che o sai jo al moment a esisitin, almancul in teorie: Il Moviment Friûl che si declare “conzelât” e mi somee che al decidi dut D’Agostini; il Front furlan che di cualchi timp al ven fûr cun declarazions publichis sui fats de cronache politiche; Il Maf de Valeria Grillo che al è daûr a dâsi dongje; e po dopo – sparniçâts – i naufragants di Converzence e di Cecot.
No mi permet di dâ sentencis o judizis, ma mi somee che la situazion e sedi cheste.
Ator di lôr o sin noaltris, chei che ancjemò no molin. Un tic stracs forsit, ma al baste lei il gjornâl par che ti torni la rabie.
Podìno fâ alc?
Secont me dome dôs robis: la prime, che e ten cont une vore de realtât, sburtâ cun fuarce i referents di chei grups che o vevi indiment prime a cirî di sentâsi ator di une taule e a metisi dacuardi suntune piçule schirie di ponts, par scomençâ a lavorâ insieme.
Seconde strade, plui fantasiose forsit ma al pas cui timps modernis: une grande assemblee, une sorte di Stâts Gjenerâi che e scomenci in maniere democratiche a dâsi une struture di coordenament.
In ogni câs, dutis dôs lis stradis a puedin puartâ al stes risultât.
Intune maniere o in chê altre, al reste clâr come il soreli che si à di fâ in presse e cun fuarce. E massime che: prin, no ni àn regalât mai nuie e, secont, che plui passe il timp e mancul nus reste di gjoldi de nestre libertât.
Dree Valcic

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +

L’EDITORIÂL / Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, […] lei di plui +