Sfuei Mensîl Furlan Indipendent
Archivi de Patrie

L’EDITORIÂL. L’autonomisim nol è un pinsîr di scuindi

............


Bisugnarès lâ ator simpri cuntun imprest par regjistrâ.
No stoi pensant a ce che si môf in Italie par vie des brutis storiis de protezion civîl, ancje se un pinsirut su la fiducie tradide dai nestris volontaris al larès fat, ma pluitost aes peraulis dopradis cuant che si cjacare o si scrîf sui muarts.
Cjapìn, par capîsi, la dipartide dal’ex president de regjon Adrian Biasutti. No jentri culì tal merit da sô vite publiche, te vicende judiziarie, ma dome sul so pinsîr su la cuistion furlane. Di sigûr nol jere, tai ultins agns, compagn di chel che al veve prime, cuant che al comandave dentri e fûr de Dc. Par lui, la specialitât regjonâl e jere nassude di une cuistion economiche e gjeografiche, la unitât e jere viodude come necessitât par vuadagnâ  rispiet a nivel roman, ma ancje european – viôt Alpe Adria e il so scuintrâsi cun Andreotti che no le voleve –. O podìn definîlu un regjonalist.
Po dopo, la sô posizion e jere cambiade. E chi al coventarès pardabon il regjistradôr, ancje se alc si pues cjatâ tes  pontadis di “Crocevia Friuli”, la trasmission di Telefriuli dulà che lu vevi invidât tant che ospit, sfidant ducj chei che lu vevin emargjinât de politiche. Biasutti al sostignive di jessisi sbaliât su la fonde de autonomie speciâl: la presince des minorancis e soredut dai furlans e jere la cuistion principâl. No dome: il destin dal Friûl e di Triest nol podeve lâ indenant adun, parcè che i interès a jerin diviers e dispès in concorince. Si sburtave dome a pensâ a une Regjon cuntune autonomie diferenziade, plui indenant nol olsave. E sul fat che la Dc furlane e jere simpri stade sotane des corints romanis, cence deventâ la Volkspartei o l’Union Valdoteine, al pensave che e fos colpe de “cortine di fier” e conseguence dal nazionalisim talian.
Nol à mai puartât indenant chescj siei resonaments, fale che in cualchi dibatit, come – mi visi – chel a Muçane, sul avignî de basse Furlane.
Parcè? Tal câs specific, forsit, nol veve intenzion di impegnâsi, o al pensave che cheste impostazion di pinsîr lu varès taiât fûr dai zûcs de politiche, viodût che insom al jere stât nomenât te comission paritetiche. Il probleme nol è, dut câs, dal singul ma invezit di une classe politiche furlane, moderade e che dispès e fâs o e faseve riferiment, ai valôrs tradizionâi dal Friûl, ae marilenghe, ae Glesie, ma mai rivade a fâ il passaç logjic e naturâl de autonomie, chê vere, no dome fiscâl.
Chei ca ,in cûr a pensin che al sedi just il “di bessôi”, ma a àn pôre a dîlu clâr e sclet, come se e fos une vergogne, une propueste “scorete”.
E no sin noaltris che o vin di tornâ a sclarî che no volin tornâ indaûr, che o sin vierts ae Europe e al mont, ma e je la stesse situazion li che si cjate e dulà che al sta colant simpri plui il Friûl, a sberlâ la necessitât di jessi protagoniscj e no sotans des sieltis che a vegnin indenant.
In sumis: no bisugne cjacarâ masse, cuant che al rive il moment di movisi.
DREE VALCIC

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +