Sfuei Mensîl Furlan Indipendent
Archivi de Patrie

L’EDITORIÂL. La strade de reson, ma e covente clarece

............


✽✽ I bascs a son dividûts di un confin statâl, e cussì ancje i catalans: di une bande sot de Spagne e di chê altre sot de France. No dome lôr: compagn pai irlandês, pai ocitans, e pes tantis minorancis nazionâls sparniçadis pal mont. Cheste situazion no gjave il fat che, di une bande o di chê altre, a son e si sintin bascs, catalans e vie indenant. Il paragon par fâ capî che a puedin ancje gjavâ vie lis provinciis, tirâ sù dal nuie gnovis formis juridichis e aministrativis di nivel plui bas di un confin statâl, ma cheste operazion no podarà, dut câs, scancelâ il nestri jessi furlans a Gurize, a Udin, in Cjargne, te Basse, a Pordenon, fintremai a Sapade e Gruâr.
✽✽ O sin furlans: nissune leç, nissune manovre politiche e podarà mai dineâ la realtât. A podaran cirî di tignîle scuindude, di fâle viodi tant che une ereditât cence sperance, di dâi cuintri cun bausiis e falsetâts, di sminuçâle e cjatâle retoriche e ridicule in dì di vuê.
✽✽ Di dut a podaran e a tentaran di fâ ma, almancul che no nus copin ducj, no rivaran insom. No si pues fermâ la aghe: tu puedis fâ une dighe, e alore tu fasis confins; un lât artificiâl, e alore tu creis une risierve indiane. Dut câs, a varan bisugne di controlôrs, di paiâ int vendude e traditore.
E cheste e sarès la democrazie?
Miôr par jê e par ducj cirî un altri troi, chel de reson.
✽✽ In Regjon a son rivâts la Serracchiani e il centriçampe. Di front si cjate une situazion grivie sedi pal lavôr sedi pal doman istituzionâl de regjon stesse. Ducj a fevelin di competitivitât, di sinergjiis, di sparagnâ. Peraulis che a son tal aiar tant che paveis. Daûr di lôr, par che a deventin realtât, a son feminis e oms, zovins e vecjos, cul lôr cjâf, cûr, afiets, storie personâl e di popul.
Cence messedâ dut, no si va di nissune bande.
✽✽ Ma par movisi, al covente il ricognossiment di cheste “esistence”: il gnûf scheme di organizazion aministrative de Serracchiani nol va in cheste direzion, l’acentrament dal podê regjonâl a Triest al è piês cun piês. Po dopo, disìnle dute: a varan ancje gjavât il tratut tra Friûl e Vignesie Julie, ma cui isal chel gnogno che nol sa che a son dôs robis diviersis? No dome par culture e storie di îr, ma par un svilup di vuê e di doman.
✽✽ Cirî di tignî dongje lis dôs cuistions, al fâs mal a di une e a di chê altre. Al stagne il progrès, al gjave flât aes ideis, ae voie di inventâsi alc di gnûf.
Si scuen liberâ energjiis, fuarcis, e no sierâlis dentri une compromission che no finìs plui.
✽✽ No fevelin plui di provinciis? Va ben. Ma cualchidun al à di rispuindi a cheste domande: cun ce fuarce istituzionâl si cjataraial il Friûl dut, chel rapresentât vuê des trê provinciis furlanis, di front a chê Vignesie Julie inventade dal nazionalisim talian par taponâ il non di Triest e dai siei interès?
Friûl – e discutìn in maniere serie e cun onestât in ce maniere struturât – di une bande, e Triest di chê altre. Cheste e je la strade de reson e de Regjon. ❚
Dree Valcic

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +