Tal mês di Dicembar di chest an o varessin di celebrâ i dîs agns de leç 482/99: Normis in cont de tutele des minorancis linguistichis storichis che e veve di inviâ la aplicazion dal articul n.6 de Costituzion taliane e dai principis di fonde de politiche linguistiche europeane che in cetancj documents e esalte la diviersitât linguistiche e culturâl tant che une risorse. Te Cjarte Europeane des lenghis regjonâls o minoritariis – Strasburg, 1992 si lei che la diviersitât linguistiche e je un element di fonde di culture e di democrazie.
Plui che di celebrazions si trate di tirâ lis sumis in cont dai pas indenant e indaûr che in chescj doi lustris la cuistion de tutele e de promozion de lenghe e de culture furlane e à fat par individuâ cun clarece il percors che o vin di fâ tal imediât se no volin che une altre desene di agns e passi e che dut al resti,come che purtrop tancj di lôr si augurin, sul plan dai proclamis e des enunziazions e pôc o nuie al mudi te pratiche. Tal fratimp lis piçulis lenghis a deventin simpri plui debilis: simpri mancul dopradis in famee, pôc tal paîs, tal borc o in glesie, pôc te radio , te television , sui gjornâi , tes aministrazions e tes istituzions e masse pôc insegnadis a scuele.
Ce no aial fat il Stât che te leç 482 si previodeve?
Sul plan internazionâl al à firmât la Cjarte europeane dal 1992 ma no le à ancjemò ratificade, vâl a dî che a nol à fat il pas concret che al pant la volontât di tacâ a metile in vore.
Il Ministeri de Publiche Istruzion nol à ancjemò fat i decrets aplicatîfs di trasmeti al Parlament, come che a si previôt tal art. 5 de L. 482 cui criteris par meti in vore i articui n. 4 e 5 te scuele de infanzie, te scuele elementâr e tes scuelis mediis.
Dopo desenis di riunions e di delegazions a Rome, si è rivâts a fadie a otignî te radio e te television dome piçui spazis sperimentâi in oris di basse scolte e cun programs no simpri di cualitât. Nissun notiziari, rârs programs culturâi. Fruçons di e in lenghe furlane.
La Universitât dal Friûl, sotfinanziade come che o savìn, no rive a rinfuarcî i cors di prime formazion, chei che a preparin i/lis mestris de scuele de infanzie e des elementârs te Facoltât di Siencis de Formazion e, dome in graciis dal finanziament regjonâl, e rive a inricjî un pôc la professionalitât di une piçule part dai docents des mediis e des superiôrs.
No si à rivât a otignî pai insegnants di furlan une classe specifiche di concors come che a àn chês altris lenghis, di talian, inglês, todesc e v.i., cussì lis scuelis e vadin simpri indenant fasint stât sul volontariât, sui mestris e professôrs che a acetin di cjamâsi ancje dal compit di insegnâ il furlan dongje de materie di titolaritât: il talian, la storie, la matematiche, la religjon, e v.i.. Cuant che i dirigjents no cjatin nissune disponibilitât dentri de scuele, a fasin contrats di pocjis oris cun int di fûr cence nissune garanzie sul cont de lôr preparazion e cuant che a cjatin i bêçs par paiâju. Cussì al capite dispès che ai scuelârs che a domandin il furlan si ufrissin un pocjis di oris – un cuindis, vincj – tor l’inizi dal an e une altre grampe di oris viers la fin.
Une prime riflession nus ven sù spontanie: cemût fasino chei scuelârs a imparâ cun serietât e continuitât une lenghe e dai contignûts che ur vegnin presentâts a tocs e bocons e cemût fasino chei insegnants a lavorâ cun passion e impegn in cundizions cussì griviis?
Une seconde domande e va fate ae Regjon Friûl-Vignesie Julie. Cemût intindie di lâ indenant cumò che la Cort Costituzionâl e à finalmentri burît fûr la sentence n. 159 dal 18 di Mai di chest an? Al va dit che la sentence e à boçat pocjis parts ma che l’implant de leç regjonâl
n. 29 dal 2007 al reste in pîts. Finalmentri però a laressin fats i regolaments par che lis scuelis a puedin metile in vore. O vin juste savût che te provincie di Udin scuasit un 70% des fameis a àn domandât il furlan e duncje a covente che lis scuelis a vegnin metudis in stât di rispuindi aes domandis des fameis e dai lôr fruts. E no si pues invocâ simpri la autonomie des scuelis che e je dome di caratar organizatîf: cjatâ lis risorsis economichis e umanis, preparâ l’orari, sielzi la metodologjie e la maniere di valutâ i risultâts dal aprendiment. La autonomie no à di jentrâ tes decisions che a rivuardin se introdusi o no introdusi le ativitât di e in furlan. La scuele e à l’oblic di aplicâ la leç statâl n. 482/99 – che a mi displâs pe Alte Cort che e je jentrade in cantins di caratar educatîf che no jerin di sô competence – e à dentri bielzà lis regulis che a rivuardin l’ûs dal furlan a scuele tant che ogjet (materie) e tant che imprest di insegnament.
E tal an che al ven e varès di sei in vigôr ancje la leç regjonâl n. 29/07.
Par chei che lu àn domandât la mê opinion e je che il furlan al vebi di jentrâ tal orari obligatori tant che la religjon e no tal POF (Plan de Ufierte Formative).
Silvana Schiavi Fachin / Silvana Spajota dai Sclâfs
Apontament / Presentazion dal libri “Patriarcjis tal cûr de Europe” e dal mensîl “La Patrie dal Friûl”
Redazion
Presentazion dal libri “Patriarcjis tal cûr de Europe” di Diego Navarria e dal mensîl “La Patrie dal Friûl”, l’unic dut in lenghe furlane dal 1946. Ai 26 di Zenâr aes sîs sot sere (18.00) te Biblioteche comunâl di Reane dal Roiâl, vie Battaglione Julio 7 – Remugnan. A saran presints: Anna Zossi, Assessore ae Culture […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +
Int di Cjargne / “La gallinella saggia” che a Cjavaç e insegne a produsi e a mangjâ ben
Marta Vezzi
La aziende agricule biologjiche La Gallinella Saggia e je nassude 7-8 agns indaûr: “La idee e je stade di mê mari – e conte Caterina Pillinini – che e à simpri fat orts e cjamps, e duncje e je une vite che si dediche ae coltivazions di tancj prodots; vint il ristorant Borgo Poscolle e […] lei di plui +
Sport… che ti trai! / Pietro Corredig e Sonia Borghese: une vite di pignatis a scufiots
servizis di Francesco Tonizzo
La cubie dai cjanalots, un di San Pieri e une di Miers, e à vinçût il campionât talian di machinis storichis e il titul european, simpri cun Sanremo intal destin Inzen, passion, amôr, dedizion, voie di zirâ il mont, spirt competitîf, leam cun il teritori des Vals dal Nadison, e risultâts une vore preseâts. Il […] lei di plui +
L’EDITORIÂL / La identitât e ven dai zovins
Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +