TERITORIS – INTERNAZIONÂL. L’aiar de indipendence al sofle

I indipendentiscj flamants prin partît de Belgjiche
Intes elezions politichis che si son davueltis ai 13 di Jugn inte Belgjiche i plui votâts a son stâts i indipendentiscj de Gnove Aleance Flamande (N-VA, Nieuw-Vlaamse Alliantie) che intes Flandris a àn cjapât passe il 28% dai vôts, ven a dî il 17,4% a nivel statâl. Il partît vuidât di Bart De Wever al à otignût 27 dai 150 deputâts che a formin la Cjamare dai deputâts.

Daûr dai indipendentiscj, i partîts plui votâts dai flamants a son stâts i cristians democratics (CD&V, Christen-Democratisch en Vlaams) che a àn vût 17 deputâts, i socialiscj (SP.A, Socialistische Partij – Anders) e i liberâi democratics (Open VLD, Open Vlaamse Liberalen en Democraten) cun 13 elets parom. Sei i socialiscj che la Open VLD a àn pierdût vôts rispiet aes elezions dal 2007, ma la pierdite di consens plui fuarte le à patide la estreme diestre indipendentiste dal Vlaams Belang che, si ben che e à otignût 12 deputâts, a ‘nd à pierdûts 5 rispiet ae volte stade. Pierdite marcade ancje pai populiscj de liste Dedecker che e à vût dome un elet. In cressite, invezit, i verts (Groen!) che a àn otignût 5 deputâts.
In Valonie, o sei la part francofone de Belgjiche, la maiorance dai eletôrs e à votât pal Partît Socialist. Cun di fat, il partît vuidât di Elio Di Rupo al à cjapât plui dal 37% dai vôts (ven a stâi il 13,7% a nivel statâl) e 26 deputâts. I liberâi dal Moviment Riformadôr a àn vût 18 elets (5 in mancul de volte stade). Plui lizere la flession dai democratics cristians (cdH, Centre démocrate humaniste) che a àn cjapât 9 deputâts e dai verts dal Ecolo che a àn otignût 8 elets. Inte part francofone dal paîs al è po stât elet ancje un deputât de diestre dal PP (Parti Populaire).
Par cumò i indipendentiscj flamants a domandin dome une riforme dal stât che e cressi il nivel di autoguvier des Flandris, massime sul plan finanziari. Dut câs, se cheste riforme no ves di rivâ in curt, al è pussibil che si rivi a di une radicalizazion dal scuintri tra flamants e valons che al podarès puartâ ancje a di une crevadure de Belgjiche. Se cussì al fos, al colarès ancje il tabù de indivisibilitât dai stâts inte Europe ocidentâl cun consecuencis pardabon dificilis di previodi.
Intes aministrativis sardis a cressin i indipendentiscj
Intes elezions aministrativis che si son davueltis ai 30 e ai 31 di Mai in Sardegne, i indipendentiscj a àn cressût vôts e rapresentants elets. Par chel che si riferìs aes provinciâls, il moviment indipendentzia

Repubrica de Sardigna (iRS) al à cjapât passe 32 mil vôts e al à cuasi triplicât lis percentuâls otignudis dai siei candidâts, passadis di une medie dal 1,48% intal 2005 al 3,86% di chest an. A cressi a son stâts ancje i candidâts di iRS elets intai conseis provinciâls che a son passâts di un a trê. Il moviment al è fuart massime in provincie di Tàtari / Sassari, dulà che il so candidât president al à cjapât 6,49% dai vôts (la liste e à vût invezit il 5,83%), e ta chê di Aristanis / Oristano (5,85% pal candidât president e 5,79% pe liste). Cun di plui i indipendentiscj di iRS a àn ancje vût elet il lôr prin sindic (comun di Pèifugas / Perfugas).
In sîs des vot provinciis sardis la vitorie e je lade ai candidâts dal centri çampe, in dôs a chei dal centri diestre. A poiâ chescj candidâts a jerin ancje doi partîts autonomiscj (ma che si declarin a pro dal dirit di autodeterminazion de Sardegne), ven a dî il Partidu Sardu / Partito Sardo d’Azione (PSd’Az) e i Rosso Mori. Il PSd’Az, aleât dai partîts di centri diestre, al à otignût percentuâls che a van dal 4,36% de provincie di Carbonia – Igrèsias / Carbonia – Iglesias al 12,83% di chê di Nùgoro / Nuoro, là che al è stât il partît plui votât de coalizion. In dut a son stâts undis i conseîrs di chest partît che a son stâts elets. I Rosso Mori, che a poiavin invezit i candidâts di centri çampe, a àn vût percentuâls che a van dal 0,40% di Aristanis / Oristano al 7,07% dal Campidanu de Mesu / Medio Campidano e cuatri conseîrs elets.
Carli Pup