Sfuei Mensîl Furlan Indipendent
Archivi de Patrie

TERITORIS – SLOVENIE. Musiche par tignî adun un popul

............

SUNÂ, ZUIÂ, RECITÂ_Te lenghe slovene, come che o podês viodi tal vocabolariut che us proponìn ogni mês, il verp che si dopre par «sunâ» musiche al è «igrati», che cjapât di bessôl in contescj diviers al vûl dî ancje «zuiâ» (ancje par sports tant che il balon) e «recitâ» (pes oparis di teatri). Trê manieris difarentis di doprâ il stes verp che a pandin un stes mût di vivi il cjantâ tant che zûc e recitazion. Cun di fat, in Slovenie il cjant popolâr fat di orchestris cuntune o plui armonichis, violins e ghitaris al ven tignût cun tante impuartance, tant che ogni dì lis principâls televisions publichis come Slo1 e Slo2 a trasmetin videos o ben trasmissions di pueste cun contignûts folk e musiche popolâr.
FILARMONICHE_ In Slovenie la prime istituzion musicâl e à passe 300 agns: cun di fat, tal 1701 e fo fondade la Academia Philharmonicorum Labacensis (dal non latin di Lubiane, Labacum), vâl a dî la antenade de Slovenska filharmonija (Filarmoniche slovene) dal dì di vuê. Tal 1765 al fo tirât sù tal centri de capitâl un teatri dut in len cun 800 puescj, che, magari cussì no, al fo distrut di un incendi tal 1885.
EDUCAZION MUSICÂL_ Lis primis scuelis li che si tacà a insegnâ musiche a forin dai prins agns dal Votcent, massime tes istituzions gleseastichis e tai coleçs dai jesuits. Par esempli, tal 1807 e nassè la Scuele di musiche te suaze dal Domo di Lubiane. Restât simpri sot de fuarte influence de musiche austriache-todescje, cetant plui preseade e cognossude, il mont musicâl sloven al tacà a vê il so puest te suaze dai popui europeans graziis ancje ae Glasbena matica (www.glasbenamatica.si), socie di musiciscj nassude a Lubiane tal Avost dal 1872. Dentri de associazion, tal 1882 e ven creade la scuele di musiche; un impuartant passaç si lu ve tal 1891 cu la nassite dal côr, altri imprest doprât dal popul sloven par tignî in vite la proprie lenghe ancje sot di parons forescj.
Cul inizi dal Nûfcent, o ben dopo de Prime vuere mondiâl e la nassite dal Ream di Jugoslavie, la Glasbena matica e ven ricognossude tant che Ljubljanski glasbeni konservatorij (Conservatori di musiche di Lubiane): za in chê volte, vâl a dî tal Març dal 1919, al contave 1100 iscrits e 29 insegnants. Tal Setembar dal stes an e nassè la sô orchestre; tal 1927 al fo nazionalizât, mintri che tal 1934 si à l’Istitût di ricercje de musiche folk slovene.
In spiete di memoreâ il 140m inovâl tal 2012, la Glasbena matica e va indevant cui siei obietîfs di promovi la istruzion musicâl, meti in pîts spetacui musicâi favorint i grups corâi e stâ daûr ae editorie musicâl.
ACADEMIE_ La Academie di musiche di Lubiane e je la uniche istituzion musicâl di nivel superiôr di dute la Slovenie. Prime de indipendence dal paîs 16 agns indaûr, culì si formarin cetancj compositôrs e musiciscj di dutis lis regjons di chê che e jere la Jugoslavie.
Simpri te capitâl slovene, e je une vore frecuentade ancje la Scuele di musiche e di balet, che e propon lezions pai arlêfs des elementârs (sîs agns), des mediis (cuatri agns) e superiôrs. E je la principâl puarte di acès par cui che al à chê di jentrâ te Academie e cjapâ il troi che al mene tal mont professionâl de musiche e dal balet.
CÔRS_ In Slovenie ancje i côrs a àn la lôr impuartance e il lôr spazi. Come ogni an, sul imprin dal Istât, a Šentvid pri Sticˇni, localitât a uns trente chilometris a soreli jevât di Lubiane, si è davuelte la tradizionâl rassegne di côrs slovens, sei de maripatrie sei des minorancis slovenis che a vivin tal cûr de Europe, clamade Tabor slovenskih pevskih zborov (Radun dai côrs slovens). La edizion di chest an, la numar 41, si è tignude ai 20 di Jugn e magari cussì no e je stade ruvinade de ploie; dut câs, a son intervignûts al incuintri uns 2500 cjantants in rapresentance di 150 grups corâi. Di gnûf un grant sucès par chest festival nassût tal Lui dal 1970, che al à chê di infuartî il sintiment di unitât dai Slovens dentri e fûr dai confins de maripatrie.
EVROSONG_ Eurofestival, in Slovenie clamât Evrosong, al è un festival di musiche che si ten ogni an intun diviers paîs european. Si trate di une sorte di gare jenfri gnovis cjançons presentadis di ognidun dai stâts che a vuelin cjapâ part: par esempli, pe edizion numar 55 che si è tignude ae fin dal Mai stât in Norvegje, a àn partecipât 39 paîs.
La prime partecipazion de Slovenie e je stade tal 1993. Chest an, dopo di une selezion fate midiant di une trasmission televisive cul vôt fat dai spetatôrs di cjase par telefon, al à vinçût il grup formât di Roka Žlindre e dal complès dai Kalamari, grup folk che al à proponût Narodno zabavni rock (Rock nazionâl divertent), une cjançon che no je masse plasude ae jurie stant che e je stade eliminade in semifinâl. A vinci e je stade la todescje Lena.
Dut câs, in Slovenie, a pet di ce che al capite in Italie, Evrosong (o Eurofestival che si clami) al è un apontament une vore sintût no dome di bande dai passionâts di musiche.
Alessio Potocco

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +