La propueste “cence confins” dai agns ‘90
Il rapuart tra sport e spetacul al cjate la sô espression massime intes Olimpiadis. E – intal cjapâ at che, di pôc, chês invernâls dal 2026 a son stadis assegnadis a Lombardie e Venit, cuntune gjite in Sud Tirôl pal biathlon – no si pues fâ di mancul di visâsi dal tentatîf valorôs, ma sfortunât fat propit de Valcjanâl intai agns ‘90 dal secul passât par proponi une edizion “cence confins” promovude insiemi di Italie, Austrie (Carinzie) e Slovenie.
Un prin tentatîf al veve tant che prin de file propit Tarvis, intant che il secont Clanfurt, e in sostance dutis dôs lis propuestis a tocjavin i stes implants fondamentâi, a imprometevin une difese rigorose dal ambient, e soredut a volevin evitâ infrastruturis e realizazions di contor che no si podessin pardabon doprâ ancje dopo fate la manifestazion.
A jerin i agns dopo de Conference di Rio, de cussience dal cambiament climatic, e il mont olimpic, in coordenament cu la ONU, al voleve distinguisi in cheste direzion, ancje par fâ dismenteâ i interès loscs che lu conotavin chê volte (e ancje vuê). Lis Olimpiadis di Lillehammer a son stadis il svolt, e in chel contest Tarvis e Clanfurt a àn zuiade la lôr partide. Ma i timps no jerin madûrs par un ricognossiment reâl trans statâl di une Olimpiade. Il CONI nol à sostignude mai la candidature, anzit intal ‘98-‘99 al à promovût Turin che al è deventât la sede dal 2006, lis partidis finanziariis a jerin tant inciertis e la stesse propueste tecniche e jere avonde debile.
Tarvis al vignì compensât dopo cul afidament di une Universiade invernâl che – a part pai assegnâts ai lavôrs – e je passade sot cidinôr mediatic, e che e je stade ancje tocjade di tantis critichis su la organizazion. Di fat, intal insiemi, la prove di compensâ la pierdite di rûl economic de Valcjanâl dopo de colade interne dai confins de Union Europeane cuntun so rilanç turistic, tacant di une struturazion centrade su grancj acjadiments mediatics, massime intal cjamp dai sports invernâi, e je lade incuintri a di un faliment.
A ‘nt ven fûr une lezion che, par gno cont, e à une valence gjenerâl. Lis prospetivis di disvilup di un teritori a àn di rispuindi a di une logjiche complessive che forsit cumò la Valcjanâl no je dotade, e dome in chel câs ancje lis iniziativis spot intal cjamp dal rapuart mediatic tra spetacul e sport a puedin judâ. In Trentin e Sud Tirôl chest in sostance al sucêt, e nol è un câs che li la intensitât turistiche e sedi di cinc a siet voltis plui alte di chê dal Friûl-Vignesie Julie, pûr gjoldint di cundizions di base, gjeografichis e di colegament in sostance identichis.
Chest nol gjave che il mût che il CONI e la Italie a àn tratade la candidature olimpiche di Tarvis al sedi stât une vore ofensîf e nol sedi stât bon di capî la impuartance culturâl di un progjet che al viodeve in Alpe Adria une vere e proprie regjon di Europe, dulà che, propit tacant di un lavôr comun su lis prospetivis sportivis, si varès capide la dibisugne di frontâ cuntune uniche “lenghe tecniche e aministrative” il guvier dal teritori e lis cundizions dal disvilup economic e sociâl.
Mi pâr une biele diference cu lis patuliis mistis che a varan di presidiâ i confins e di decidi cuâl afghan o pakistan che mi tocje a mi invezit che a ti! ❚
Giorgio Cavallo