Sfuei Mensîl Furlan Indipendent
Archivi de Patrie

Sport e spetacul a fasin ben ae economie, ma no stin pretindi masse de Madonute dal Lussari

............

Tape dal Zîr di Italie fin al Santuari.
Dibatiment viert su la sô sostignibilitât ambientâl

Sport e spetacul. Dispès a stan ben insiemi. Altris voltis no.

La propueste di fâ rivâ fin ae vile dal Santuari de Mont sante dal Lussari une tape di un futûr Zîr ciclistic di Italie e à viert un dibatiment su la sô sostignibilitât ambientâl.

Par cualchidun, dut al è pussibil, imprometint di fâ atenzion ai particolârs organizatîfs; par altris, a son promessis di marinâr. Pôcs, cun di plui, si domandin se al sedi un cualchi aspiet religjôs di rispietâ.

Il Friûl al à cognossût za dôs rivadis di mont a efiet spetacolâr: il Çoncolan e i Plans dal Montâs a Nevee. Intal prin câs, si è tratât di un sucès che al à inviât ancje un interès turistic che al dure pai apassionâts des dôs ruedis. Il secont, al veve fin dal prin moment intiziât reazions negativis pai lavôrs di adatament che a coventavin pe sigurece e pe cualitât des ripresis televisivis, e intal timp nol à produsût nissun element positîf di riclam.

Intal câs de Mont sante dal Lussari, si varès di doprâ la piste forestâl che e rimonte de Val Saisare e al è palês che l’adatament ae gjestion no dome de corse, ma ancje dal spetacul, al pues vierzi spazis di trasformazion impuartants.

Al è ancje un aspiet faunistic di segnalâ. La corse si fasarà inte Vierte, la stagjon plui delicade pe riproduzion de faune, e, cuntun ricuart personâl divertent, mi ven iniment che la uniche leç regjonâl (1991) che e puarte il gno non, e je chê che e improibìs la cjace in Primevere al gjal cedron. Al jere un (sic!) gjal ad an che al vignive cjapât in Valcjanâl in memorie de tradizion venatorie asburgjiche. Viodarìn!

La cuistion dal rapuart tra la alte mont e il spetacul di masse no tocje dome che il sport, ma ancje la musiche, no ciert chê classiche che ancje tancj ripârs de nestre regjon a organizin, ma vêrs concierts “rock” di stelis di prime grandece che a puartin a cuote alte ancje desenis di miârs di fans. Cun polemichis cence fin.

Par concludi la cuistion de Mont sante dal Lussari, si à di visâsi che no je la postazion discognossude di un eremite, ma un lûc une vore frecuentât par motîfs religjôs, di bande di slovens, carinzians e furlans: e fâs part dai fuartins de fede catoliche, intune cui Santuaris di Montesanto, Madone di mont, e Marie Luggau, puescj a presidi di ogni penetrazion de “riforme” dopo dal Concili di Trent.

Ma la Mont sante dal Lussari e je ancje une struture sportive impuartante pal schi alpin, in particolâr cu la piste di Prampero, cualchi volte doprade par manifestazions sportivis di nivel (Cope dal mont), ma soredut otime pai alenaments di atletis di alt nivel.

Ae fin dai conts, forsit no vâl la pene di riscjâ erôrs facii di progjetazion di un avigniment tant che la tape dal Zîr di Italie par une perle za ben cognossude e frecuentade. La Madone de Mont sante dal Lussari e ame lis mountain bikes e no il businâ di machinis, motocicletis e elicotars.❚

Giorgio Cavallo

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +