LA VÔS DE CISL. TASI: ce che e je e cemût che si paie

Tasi al è l’acronim di Tasse dai servizis indivisibii e e je une componente de IUC (Impueste Uniche Comunâl) destinade ai servizis comunâi tant che la anagrafe, il furniment urban e la iluminazion publiche.
A varan di paiâ ducj i fabricâts, lis abitazions principâls, lis impresis e lis areis edificabilis. A saran esentâts i terens agricui.
La Tasi no à cjapât il puest de Imu, abolide dome pes abitazions principâls fale chês di lus (A/1, A/8 e A/9). Duncje, il proprietari al podarès paiâ dutis dôs lis tassis o dome une des dôs daûr chel che ogni singul comun talian al deliberarà dentri dai 18 di Setembar (scjadince di viersament ai 16 di Otubar) o al à deliberât za dentri dai 31 di Mai (scjadince di viersament ai 16 di Jugn).
I sogjets obleâts al viersament a saran i proprietaris dai imobii o cui che al sedi titolâr di un dirit reâl di gjoldiment (usufrut, dirit abitazion, e v.i.).
La novitât a pet de IMU al è che subiets obleâts a saran ancje i incuilins o comodataris par une cuote che no pues jessi plui basse dal 10% o superiôr al 30% di chel che al è dovût. Di consecuence, sul imobil afitât o concedût in comodât il proprietari al metarà dome che la diference (90% – 70%).
Il calcul al pues jessi complès: si partìs de jentrade catasticâl dal imobil, rivalutade dal 5%, e si le moltipliche par un coeficient di 160 intal câs di cjasis e abitazions (80 pai uficis, 55 pes buteghis, 65 pai imobii struturâi). Dopo si metin intal calcul lis alicuotis e lis detrazions fissadis a nivel comunâl.
Tant che in passât pe ICI e pe IMU, la gruesse dificoltât di cheste impueste e je la presince sul teritori talian di vot mil comuns che a àn plene autonomie di legjiferâ cu la consecuence che ogni comun al varà regulis di aplicazion e di calcul diviersis.
Cussì, par esempli, o vin comuns che a aplichin la Tasi dome ae abitazion principâl (che no je subiete ae IMU), intant che altris comuns a aplichin alicuotis diviersis su dutis lis tipologjiis di imobils. Cun di plui, su la abitazion principâl al è pussibil cubiâ une detrazion fisse e in cualchi câs ancje une pe presince di fîs residents. O la detrazion si apliche a scaions decressints cul cressi dal valôr catasticâl dal imobil. Ultin fatôr pussibil di complessitât al è la eventuâl domandade di presentazion dal model ISEE cun indicadôrs sot che a àn di jessi sot ciert nivei par otignî la esenzion de Tasi. ❚
✒ Marianninna Rocco, Responsabile Fiscâl CAF CISL Udin