Un Istât in mont

Cuntun pôc di ritart rispiet ai agns passâts, manzis, vidiei, pioris e cjaris di fin di Jugn, prins di Lui, a àn tornât a cjapâ la strade pe mont, a passon. Si è tornât duncje a ripeti il rît secolâr de transumance che a dispiet dai timps che a cambiin, al reste un dai ponts di riferiment de economie montane. A son cirche un centenâr in Friûl-VJ i arlevadôrs che a resistin a cjamâ lis malghis, une cuarantine in particolâr chei che a rezin vacjis di lat e a produsin formadis, scuetis e altris prodots. Di medie ogni arlevadôr al puarte a passonâ des cincuante al centenâr di manzis tai pascs di Cjargne, Val Cjanâl, Glemonat e Friûl Ocidentâl, “cun problemis simpri plui intrigôs” al conte Alberto Pischiutti, president de Cooperative regjonâl dai malgârs. “Aes rognis che di an in an si sglonfin – al spieghe – chest Istât o vin ancje il fastidi dai dans che e à lassât la pesante neveade dal Invier passât, cun trois slambrâts, caseris ruvinadis e lozis di comedâ; po dopo o vin ancje il probleme de aghe che e à di jessi potabile par podê rispietâ ducj i criteris igjenics sanitaris che a coventin a produsi il çuç, in sostance e je simpri une bataie”. Un pocje di sperance le dan i zovins che tai ultins agns a àn tornât a vê passion di chest mistîr, dûr e plen di sacrificis. “E je vere: si stan tornant a svicinâsi – al conferme Claudio Peresson, un dai arlevadôrs cun plui esperience de Cjargne – cualchidun al à cjapât il testimoni dai gjenitôrs o dai nonos, cualchidun altri invezit si è fat indenant di bessôl. ancje chi però o vin di fâ i conts cul dret e cul ledrôs de medaie, parcè che se e je vere che i zovins a stan tornant in malghe, diviers di lôr no àn la formazion juste par cuvierzi ducj i mistîrs, in altris situazions invezit a son i vecjos che no vuelin molâ dal dut la man e a stentin a fidâsi”.
I passaçs gjenerazionâi a àn puartât ancje un miorament de cualitât des lavorazions e duncje ancje dai prodots, lu conferme Ennio Pittino, che pal Ersa, l’Ent regjonâl pal svilup rurâl, al seguìs malghe par malghe ce che al sucêt in mont: “dîs, cuindis agns indaûr o cjatavin arlevadôrs stracs, demotivâts, che a volevin molâ dut, cumò o vin malgârs e casârs di sucès e formadis e scuetis che a vincin premis ator pal arc alpin. Risultâts che si sta otignint ancje in gracie dal PPL, un disciplinâr che al regule lis “piçulis produzions locâls” e che al covente par rispietâ dutis lis normativis di leç ma ancje par podê vendi i prodots a un presit remuneratîf par cui che iu fâs. Di fat un altri probleme dal sisteme al è chel di rivâ a sostegnî i coscj de ativitât economiche – al fâs notâ Pittino – cui che par esempli al à ancje l’agriturisim tacât de malghe al è fortunât parcè che al dâ fûr subit ce che al prodûs, chei invezi che no lu àn, a àn par fuarce di cirî altris stradis”.
Il sisteme des malghis de nestre Regjon no stin a dismenteâsi al à dople e triple funzion: di une bande al permet une produzion di trasformazion dal lat di altissime cualitât, di chê altre al ten net e curât l’ambient, tignint cont di dut il teritori di val, riviestint tra l’altri une part impuartante di atrazion pal turisim estîf.
Al sarès biel in definitive che la Regjon e metès adun une riforme complessive in stât di proviodi di une bande un sisteme incentivant e just par chei che pardabon a crodin tal setôr, di chê altre intervents specifics pal mantigniment des stradis forestâls e dai trois, cence dismenteâsi di meti a bant malghis e stalons publics dant prioritât ae int dal puest. ❚
✒ David Zanirato