Il scandul des Latariis Furlanis al pues deventâ une buine lezion

Il scandul dal lat infet al è une di chês robis che nus lassin cence peraulis. A dî il vêr no: lis peraulis a son tantis, ma dome che a saressin dome blestemis. Cemût che e je lade la cuistion lu savês ducj. I Carabinîrs a àn cjatât  tossinis, intune cuantitât vietade, dentri il lat des Latariis Furlanis di Cjampfuarmit.
Ce biele figure e ce dam, no dome pe nestre salût ma ancje pe nestre muse di gjenuinitât dai prodots.
E noaltris cocâi che o vin fate une bataie di principi par difindi il consorzi, par che nol ledi tes mans di Granarolo. Un simbul. Latariis Furlanis al rapresentave un simbul dal lavôr, de tiere furlane.
Cumò o sin tant che chei altris: imbroions e delincuents. No dome, o zuìn cun la salût de int.
Se po dopo cualchidun al à la muse di fevelâ di “pome patoche”, dant la colpe dome a cualchi diretôr galiot o, piês ancjemò, disint che in sumis la robe “no jere tant pericolose” o che lis misuris a son masse esigjentis, o sin propit dal gjat.
No vin di vê nissune remission par chei che a doprin lis peraulis “Friûl” o “furlan” par determinâ la cualitât di un prodot o di un imprest. Cheste definizion o vin simpri dite che e je un alc di plui, parcè che e fâs di spieli ai valôrs che i stan daûr: onestât, lavôr, serietât e competence.
Se ancje dome une di chestis cualitâts e va al mancul, e salte dute le mignestre e tu pierdis di bot dute la fiducie. Di plui, parcè che il tradiment si paie dôs voltis.
Ancjemò alc. Se un prodot, un imprest si clame “furlan”, il so jessi sul marcjât no je une cuistion dome dai siei parons, de sô dirigjence. Al à di rispuindi ae coletivitât. Il so profit, il so interès al ven daûr a chel “furlan” che al dopre par fâsi cognossi.
Ancje noaltris, dut câs, o vin il dovê di vigjilâ sul lôr procedi. O vin di pretindi che lis garanziis, soredut tal setôr alimentâr, a sedin massimis: se in Italie son a un nivel, in Friûl a àn di jessi di plui. No vin di vê pôre di “lâ fûr marcjât”: la cualitât e paie simpri.
Se cualchidun al dopre altris stradis, al va cuintri l’interès dal Friûl.
Cheste no je filosofie: i nestris contadins, i arlevadôrs che a puartin il lat ai consorzis, no àn di stâ cidins: cu la fadie de produzion, cui presits no juscj par chel che a fasin, no puedin sierâ i voi.
La politiche e à simpri decidût par cont so cui che al veve di comandâ tai consorzis, e la nomine de gnove presidente Michela Del Piero a Latariis e rive tant che une conferme. E cussì, e coste di plui la struture dirigjenziâl che no la produzion.
In sumis: cheste pagjine di Latariis Furlanis e je une vore maluseriose, ancje dificile di gloti. Fasìn almancul che e coventi a alc. ❚
✒ Dree Valcic