MUSIS DI…FACEBOOK. Flash mob e tradizion, gnûf e vieri metûts insiemit di une gnot magjiche: “la gnot dal agaçon”

La Patrie dal Friûl e je aromai passe di un an che à inviât la sô pagjine Facebook. Un imprest par difondi il gjornâl, ma ancje par incuintrâ e dialogâ cui letôrs e cu la int che e baline pal social network. E cussì al capite di incuintrâ cualchi realtât interessante…
✽✽✽
Il mês stât pe vilie di S. Zuan (la gnot dai 23 di Jugn), su Facebook o vin cjatât une iniziative singolâr: un flash mob virtuâl par celebrâle. Un flash mob al è il metisi dongje di un trop di personis intun spazi public par fâ su une azion particolâr, par tornâ a sparniçâsi vie subit dopo; in chest câs al è stât fat su la rêt, midiant Facebook, par coinvolzi ducj i furlans tal mont tal rignuvî i rîts antîcs. La vilie di S. Zuan, di fat, e je la gnot magjiche par ecelence li che si fasin antîcs rîts di amôr, buine fortune, strolegament. Il plui famôs forsit al è la barcje di S. Pieri cul blanc dal ûf te aghe. O vin sintût la ideadore di cheste iniziative, Roberta Masetti, par savê cemût che e je lade.
Mandi Roberta, cemût âstu tacât a interessâti di furlan e di tradizions e ce fâstu te vite?
Jo o fâs la decoradore. Par tancj agns no mi soi interessade dal furlan, fintremai che su la mê strade o ai cjatât bons. Gjilbert Pressac, e daspò, traviars di lui Renato Jacumin, pre Toni Beline, fin a rivà a Galliano Zof e pre Meni Zannier.
Cussì o ai tacât a cjapâ a cûr lis tradizions furlanis. Però jo no soi une “studiade”, o soi une passionade.
Vuelistu spiegânus inanzidut la idee e cemût che ti è vignût di proponile in internet?
Cuant che o jeri piçule mê none, mari di mê mari, che si clamave Mariute, mi à insegnât a fa la barcje di S. Pieri cul blanc dal ûf. Ca di nô, su lis cuelinis di Murùs si fâs la Gnot di S. Zuan, daspò o ai scuviert che vie pal Friûl si fâs ancje a S. Pieri: di li al è partît dut e cussì o ai pensât di tornâ a proponi cheste robe cuant che mi soi inecuarte che lis gnovis gjenerazions no savevin nuie.
Cun di plui chi, a Murùs, nô o vin une liende scrite ancje di Catarine Percude, che conte de Gnot di S. Zuan, di un cocolâr e di ce che e fâs la rosade, o agaçon. Cussì, une dì di un pâr di mês indaûr, in chat cun Eduardo Dino Baschera dal Fogolâr Furlan di Buenos Aires, i ai butade fûr la idee e lui al à dite di sì, subit.
E duncje ce vêso fat?
O ai di dî grazie ai amîs argjentins, soredut a Eduardo e a la sô femine Noemi “Mimi” Salva, che a àn imbastide subit une pagjine grafiche, e le àn metude in Rêt.
Al è stât un moment che jo e Mimi o stavin lavorant tal stes moment a butâ jù il test, in condivision, jo chi e Mimi de Argjentine… une vore emozionant!
Ancje la Zonte di Murùs, confermade des elezions, e à aderît cun entusiasim. Oltri a la iniziative su internet o vin fat la gnot dal agaçon lant pai prâts, o vin fat ancje un video. Al jere ancje il sindic, Roberto Pirrò, e a la assessore a la culture e vicesindic Albina Montagnese…
Il president dal Ente Friuli nel Mondo, Piero Pittaro, al à dite a ducj i fogolars di aderî, e i tre amîs da la stampe, Silvano di Varmo, Elio Varutti e Walter Tomada a àn publicizade la iniziative cui lôr articui. E un grazie a dute la int che e à partecipât: o vin invidât a mandâ imagjins de lôr “gnot dal agaçon” e ancjemò al sta rivant materiâl: ancjemò no podìn dî in trops che a àn partecipât!
Intant o podìn dî che su la nestre pagjine o vin scrit i varis incjantesims che o proponevis e la robe e à vût un successon. Prossim an si tornial a fâle?
Sì, il prossim an si torne a fâ: il comun mi à date disponibilitât, e o slargjarìn la robe. Ancje parcè che aromai il progjet lu vin tacât nô e no si pues lassâlu pierdi. Soredut, apont, o vin la liende dal cocolâr, cemût che o disarin il prossim an…
E je voie di tradizion, se proponude in maniere atuâl e ben fate: ce pensistu?
Un cjâr amì mi à dit simpri: compagne la tradizion cu la inovazion… Ve ca! Cussì al è plui facil interessâ lis gnovis gjenerazions, ancje se par dî il vêr, ancje tante int no plui zovine si cjate su Facebook. Chel di internet al è un public imens, e plui facil di fâ savê une robe, soredut ator pal mont.
Par te internet e i social puedino judâ lis piçulis lenghis?
Po sigûr che lis gnovis tecnologjiis a puedin salvâ e difondi lis piçulis lenghis. Intun mont globâl, là che peraulis e usancis a tabain inglês, lis piçuli lenghis a puedin fâ la diference. Dome mantignint la proprie identitât si pues cressi come mont intîr: cressi come culture, come rispiet, come creativitât. ❚
Dree Venier