LA VÔS DE CISL. Detassazion des sumis di produtivitât dai lavoradôrs dipendents

La detassazion des sumis corispuindudis ai dipendents lavoradôrs leadis aes incressitis di produtivitât dal lavôr, di cualchi an in ca e ven riproponude in maniere periodiche, patint però di une volte in chê altre modificazions normativis.
E je une tassazion agjevolade al 10% secje, in sostituzion de tassazion ordenarie Irpef che e je peade a scaions di alicuotis (minime 23% massime 43%) e al redit complessîf dal contribuent (efiet sume di ducj i redits cun tassazion plui alte a pet de tassazion dai redits singui).
Ai 29 di Avrîl di chest an, a son stadis publicadis lis modalitâts atuativis de agjevolazion pal 2014.
A son di podê subietâ ae impueste sostitutive dal 10% lis sumis erogadis:
– a titul di retribuzion di produtivitât;
– in fuarce di acuardis coletîfs aziendâi o teritoriâi;
– ai dipendents dal setôr privât (chei dal setôr public a son escludûts);
– ai dipendents che intal 2013 a àn cjapât un redit di lavôr dipendent no superiôr a € 40.000, al sporc dai premis di produtivitât dal an stes.
L’impuart massim di premis di produtivitât che su chei la aziende e pues aplicâ la impueste agjevolade al è di € 3.000 al sporc. A varan di fâ atenzion particolâr i dipendents che dilunc dal 2014 a cambiin datôr di lavôr. Se a fin dal an si cjatassin cun impuarts distassâts superiôrs ai 3.000 €  a varan l’oblic di presentazion de declarazion dai redits par podê paiâ la impueste dovude.
Il singul dipendent al pues rinunziâ a chest regjim agjevolât domande par iscrit al propri datôr di lavôr. Di fat, in cualchi câs al pues risultâ no convenient aplicâ la detassazion al 10% pitost che la tassazion ordenarie Irpef. A son i câs là che il dipendent al cjape redits tant bas (par esempli plui bas di € 8.000 par 365 dîs lavorâts) che su chei l’efiet de detrazion di lavôr e anule ad implen la impueste al sporc dovude.
O i câs là che il dipendent al presente detrazions tant altis (cjamis di famee impuartantis pe presince di tancj fîs, o grandis spesis medichis o di ristruturazion) che di fat ancje in chest câs a anulin la impueste al sporc.
Intai câs che si à fevelât la tassazion Irpef e sarès pâr a zero, intant che la detassazion e sarès dal 10%: ve duncje che al conven no optâ pal regjim sostitutîf di tassazion dai premis di produtivitât e lassâju a tassazion ordenarie. ❚
✒ Marianninna Rocco, Responsabile Fiscâl CAF CISL Udin