Sfuei Mensîl Furlan Indipendent
Archivi de Patrie

BLANC, finalmentri un lat pardabon furlan

............

Tai mês passâts o vin resonât su la produzion e sul consum di lat, in gjenerâl dentri di logjichis comerciâls li che dispès il lat cun nons furlans (“Carnia”, parsore ducj) te lôr filiere di furlan o cjargnel a àn ben pôc: plui lat de Bavarie che di chenti. Ancje lat bon, eh: culì no si fevele di robis pericolosis su lis taulis dai furlans, ma almancul savê che – in barbe al non – no si sta comprant alc di chenti, ma une robe che e rive di lontan. Con buine pâs dai nestris arlevadôrs che a àn di contentâsi di dome 40 centesims al litri…
In chest senari no masse confuartant, dut considerât al fâs plasê viodi che il nestri compart agroalimentâr al prove a reagjî. Plui o mancul cun eficience (disìn che o stin li a viodi ce che si savarà tirâ fûr di chê che su la cjarte e je une buine idee…), ma almancul alc di bon al somee che si movi. Tant che la notizie di chestis setemanis de nassite dal “Blanc”, vâl a dî di un lat dut furlan certificât e garantît dal Consorzi Agrari dal F-VJ, e somee che e sedi un rai di soreli.
Tal imprin, chest lat finalmentri “nestri” – risultât de fusion dal Consorzi Agrari cun Aprolaca – al sarà comercializât in pocjis buteghis, ma il progjet al promet di rivâ a cuvierzi dut il teritori talian di ca a cualchi mês, pontant a meti sul marcjât dentri de fin dal an 200 cuintâi di lat in dì. Chest tant par tacâ, parcè che e partirà subit une altre fase, par produsi formadi Montâs e altris prodots di latarie (formadis, strachin e mozarele), ducj garantîs de marcje F-VJ, in gracie di une colaborazion tra il Consorzi e une rêt di latariis dal F-VJ.
“Blanc al vignarà imbutiliât – al à spiegât Oliviero Della Picca, diretôr dal Consorzi, te conference di presentazion – tal stabiliment de famee Driussi di Felet e al sarà distribuît dal Consorzi. O vin inviade ancje une colaborazion cul Ineq di Sant Denêl (Istituto Nord Est Qualità) par vê la certificazion dai prodots, cul obietîf di cjapâ la marcje Aqua, in colaborazion ancje cul Ersa, par valorizâ miôr la altissime cualitât dal lat dei nestris arlevadôrs, considerât fra i miôr di Italie”.
Par lavorâ su la promozion e su la culture dal prodot nostran di cualitât, cu la campagne promozionâl di Blanc (afidade ae agjenzie Unidea di Udin), i arlevadôrs coinvolts tal progjet a vierzaran ancje lis lôr stalis aes visitis di consumadôrs e scuelis, e la marcje Blanc e sarà ancje sostignude cuntune robuste comunicazion, doprant ancje i social media.
Lis intenzions e il progjet, su la cjarte, a sunin ben, e no si pues fâ di mancul di fâ i auguris a une iniziative che finalmentri e fevele di doprâ la nestre cualitât e la nestre tradizion tant che strument par provâ a rilançâ la economie. Sperant di cûr che ancje i consumadôrs furlans, tal moment di comprâ il lat, a vedin iniment la impuartance di premiâ i prodots di chenti. ❚
Margherita Timeus

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +