Sfuei Mensîl Furlan Indipendent
Archivi de Patrie

Il doman de cjadree

............

Il Distret de Cjadree al è stât par tant timp la risorse industriâl plui impuartante de provincie di Udin, determinante pe cressite industriâl, economiche e sociâl dal teritori e pe imagjin dal Friûl in Italie e tal forest.
Il crac patît dal Distret al è tacât intal 2002, al è lât indevant inte seconde metât dal deceni passât e ancje sul tacâ dal atuâl.
Ma il Triangul de Cjadree saraial ancjemò impuartant? Tant, masse di mancul!
Simpri restant che i imprenditôrs de cjadree no àn slusicât par previdence – grampant il plui pussibil intal imediât, cence dimandâsi cemût stâ sul marcjât ancje intal futûr –, e je ore che la politiche e scomenci a calcolâ in maniere concrete la impuartance dal Triangul de Cjadree, cun intervents smirâts a fermâ il so declin.
Intal 1991 il trafic mobilîr in esportazion dal Friûl-Vignesie Julie al jere il 22,1% di chel talian, intal 2001 al jere il 18,1%, intal 2013 dome che il 14,2%. Il trafic in esportazion de provincie di Udin al rapresentave il 14,7% dal totâl nazionâl intal 1991, il 10% intal 2001 e il 5,4% tal 2013. In confront a plui o mancul 20 agns indaûr, la provincie di Udin e à plui che dismiezât il valôr dal propri trafic di mobii in esportazion, lant jù dai 953 milions di euros intal 2002 ai 448 dal 2013. Si è consumade une contrazion cetant impuartante in chei dodis agns luncs e dolorôs, passâts tra une misture di indiference e di rassegnazion di bande di ducj i grups dirigjents.
Devant di chest senari o volaressin che la politiche si fasès indenant cun decision. Plui voltis, tant che Filca Cisl, o vin dât l’alarme. Dal 2000 si son pierdudis 369 impresis, lant jù aes 42 in ativitât ai 31 di Dicembar passât. Si à pierdude une energjie imprenditoriâl impuartante e une grande oportunitât pal inseriment a vore di zovins e di feminis.
La crisi e à scancelât i grancj grups di cjadreis, sparagnant dome un. La evoluzion dal faturât fat des cincuante impresis plui impuartantis de aree e fotografe in maniere brutâl il cediment: dai 710 milions dal 2001 al è calât ai 340 dal 2009 e ai 277 dal 2012, cuntune pierdite che e lenç i 2/3.
A pericul, vuê, e je dute la struture industriâl provinciâl e, plui in gjenerâl, regjonâl.
Nol è il câs che e fasi la stesse fin dal Distret de Cjadree. Se e je une cussience efetive de centralitât dal setôr des manifaturis inte economie e intal lavôr, al mancje però ancjemò un plan di politiche industriâl regjonâl, sostanziât – par ce che si pues auspicâ – ancje des propuestis dai rapresentants dai lavoradôrs e des impresis.
Un altri intervent intardât nol varès justificazions, parcè che falâ ancjemò une volte, in plui che diabolic, al sarès mortâl pe economie e pe comunitât furlane. ❚
✒  Gianni Barchetta, Segretari Regjonâl FILCA CISL Friûl-Vignesie Julie

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +