MUSIS DI…FACEBOOK. A pescje di amîs sul Muselibri

La Patrie dal Friûl e je aromai passe di un an che à inviât la sô pagjine Facebook. Un imprest par difondi il gjornâl, ma ancje par incuintrâ e dialogâ cui letôrs e cu la int che e baline pal social network. E cussì al capite di incuintrâ cualchi realtât interessante…
✽✽✽
Une pagjine dal argoment cetant specific, ma cun passe 2.500 adesions (i “Mi piace”): “Pescjadours Furlans” nus à incuriosîts une vore. Ancje par vie dal paron di cjase, un zovin cuntune grande cise di cjavei riçots che al somee propit simpatic. Viodìn…
Mandi, prin di dut cui sêstu e di indulà?
Bundì a ducj, mi clami Simone Varnerin, o ai 21 agns e o soi origjinari de Val Tramontine.
Nus contistu l’argoment de pagjine, ancje se al è clâr za dal titul, e parcè che tu le âs vierzude?
La grande passion pe pescje mi à puartât a creâ cheste pagjine su FB! In plui di noaltris “pescjadours furlans”, tal sît si puedin cjatâ pescjadôrs di dute Italie e la robe plui biele e je che a nassin simpri gnovis amiciziis. Jo o pratichi chel che si clame Catch&Release, par furlan Cjapâ&Molâ, che al consist tal cjapâ il pes e dopo liberâlu tes cundizions di prime. A varessin di praticâlu ducj i pescjadôrs par rispietâ i nestris flums e il nestri pes. Magari cussì no, in pôcs lu pratichin parcè che cui che al cjape il pes al à il vizi di tratignîlu, o par fâsi dî “brao” o par mangjâlu. Ma se o gjavassin ducj i pes, fra un an ce pescjaressino? La pescje e je un sport, o vin di lâ a pescje par divertîsi e no par mangjâ: se ducj a tacassin a molâ o varessin pes maraveôs dentri dai nestris flums.

Cemût âstu fat a vê passe 2.500 amîs, e ce robe ise che e funzione di plui su la tô pagjine par cjapâ – anzit par pescjâ! – i “Mi piace”?
La uniche arme segrete par vê tancj “fan” al è dedicâ timp a di cheste pagjine maraveose, e come par dut fâsi publicitât, fasint ancje cognossi i nestris puescj fantastics e il nestri pes.

Soredut ator par Facebook a son tancj “animaliscj”, un tic fûr di scuare. Âstu mai vût polemichis par vie de tô pagjine?
Sì, o ai vût ogni tant cualchi discussion, ma jo o rispieti la opinion di ducj, baste che no sedi une critiche dome par fâsi viodi de int e dopo invezit… mangjâ sù di dut! No fâ i fints moraliscj, in sumis.
Biel ancje il logo de pagjine, tant che tu âs fat ancje maiutis e felpis “Pescjadours furlans”. Di cui isal il logo e cemût vadial il marcjât?
Il logo lu ai fat jo, e une siore grafiche mal à metût a puest. Maiutis e felpis a àn vût un grant sucès, a son plasudis a ducj!
Secont te, Facebook e i social puedino judâ lis piçulis lenghis?
Par chel che al rivuarde lenghis e dialets, i social a son une arme micidiâl: in plui che judâ a difondiju simpri di plui, a judin a tignîsi leâts ae lenghe. La lenghe e zirarà simpri se e je fevelade: come che o dîs jo, miôr brusâ un paîs che pierdi une tradizion.
Ultime domande, cuant taistu i cjavei?
I cjavei no ju tai, se no adiu mimetizazion, ah ah ah! ❚
Dree Venier