Par Schiavi Fachin l’Ateneu al à fat scjampâ int preparade e pierdût cetantis ocasions. Avonde par dî che la leç istitutive no je stade rispietade fin insom
Timp di celebrazions, timp di belançs: ma dopo ducj i esams che e à fat par produsi plui di 50 mil laureâts, a 40 agns de sô nassite al è rivât il moment di meti sot esam ancje la Universitât dal Friûl.
Il so compit lu à simpri davuelt ben, ma e je une materie, la “Furlanetât”, dulà che i vôts no son cuissà ce. Peraule di Silvana Schiavi Fachin, che e à vivût in prime linie la concuiste de Universitât e lis bataiis che – magari cussì no – intes celebrazions a finissin par jessi cuasi platadis. «La storie uficiâl – e dîs – e da i merits de politiche, ma e tâs sui vêrs paris che prin di Tarcisio Petracco a àn pardabon semenât ben, coltant il teren che al à permetût di cjapâ sù 125 mil firmis e di dâ un sburt decisîf ae propueste di leç pe istituzion dal Ateneu: a son oms tant che Fausto Schiavi, che cul Moviment Friûl al veve puartade indevant une azion politiche indreçade ancje di un tribun straordenari che al à dismot la cussience dai furlans, ven a stâi pre Checo Placerean. Ma a son ancje figuris tant che il gjeograf e climatolic Joseph Gentilli, che al insegnave di chê altre bande dal mont, a Perth, ma che al fo il prin che al doprà la locuzion “Universitât furlane” e al valorizà la nature plurilengâl e multiculturâl dal nestri teritori, un unicum a nivel european, tamesant za tai agns Sessante lis dibisugnis professionâls e economichis che un Ateneu al podeve sodisfâ».
Dismenteâsi di chescj “profetis” intes celebrazions uficiâls nol è un bon segnâl, e somee dî la Schiavi, professore par agnorums di didatiche des lenghis modernis, e sostignidore dal disvilup de Universitât ancje intal periodi dulà che e je stade parlamentâr de Republiche taliane (dal 1987 al 1992) in Comission Culture, intant che il retôr al jere Marzi di Strassolt. «O ai fat ce che o podevi pal nestri Ateneu. Chest mi permet di cjalâ cun voli sclet ancje aes pecjis de Universitât dal Friûl. Che e à dineade la sô stesse reson di jessi cuant che e à scancelât dal so Statût l’art. 26 de leç n. 546 dai 8 di Avost dal 1977. Al jere il plui inovatîf che si podès pensâ». Soredut là che al fevelave dal rinovâ i «filons origjinâi de culture, de lenghe, des tradizions e de storie dal Friûl». Articui volûts di Arnaldo Baracetti e di Gino Di Caporiacco, che a sclarivin cemût che il valôr plui alt de Universitât al veve di jessi il leam cul teritori. «Invezit – e sclarìs la Schiavi – la formazion e la cussience in merit ae impuartance des lenghis che a son lis fondis de culture de nestre comunitât e je ancjemò une vore basse. Tal cuarp docent no si è fat masse par dâi valôr, e i students al è clâr che no domandin alc che nol ven prin valorizât de istituzion academiche».
Al è duncje un paradòs, ma tantis voltis lis ricercjis plui impuartantis su tancj aspiets dal Friûl no vegnin de Universitât dal Friûl, ma di inaltrò: la Schiavi e fâs doi esemplis dome tal so cantin, chel linguistic. «O vin un patrimoni straordenari come la culture saurane, ma i studis di plui grant interès su Zahre a son stâts fats di un studiôs inglês de London School of Economics, Norman Denison. E intant un grant studiôs come Giuseppe Francescato, che al sarès jentrât a fâ part dal organic cun plasê, te Universitât dal Friûl nol à mai cjatât puest».
Ancje in altris câs, l’Ateneu al à pierdudis ocasions impuartantis. «Come cul Grant Dizionari Bilengâl Talian-Furlan, che al podeve movi la costituzion di un “team” di ricercjadôrs e tesiscj che al les a sclarî e a insiorâ il dizionari, lant a configurâ un Dipartiment di linguistiche aplicade. Invezit, si è sierât intun isolament che nol à fat di sigûr cressi il numar e la competence di chei che si ocupin di furlan». Altre ocasion pierdude: «A jerin stâts stanziâts 28 milions di liris par fâ targhis bilengâls par dutis lis facoltâts». Ma l’euro al è jentrât in vore tal 2001 e ancjemò in dì di vuê lis targhis no si viodin pardut.
Il pecjât che dut câs la Schiavi no perdone ae sô Universitât al è di vê fat scjampâ int preparade «che in chescj setôrs, invezit di lavorâ chenti, e je sparniçade ator par Anglie, Gjermanie, Spagne, Cechie e cuissà di ce altris bandis». Al bastarès chest forsit par dî che la leç istitutive no je stade rispietade fin insom: ma il probleme aromai nol è tant analizâ i pecjâts, ma cjatâ la assoluzion. E par fâlu bisugne tirâ sù une Universitât che e pensi di jessi furlane, come che i siei paris, soredut chei dismenteâts, le varessin volude.
di Walter Tomada
