Lis lidrîs dal vin inte sfide de pandemie

Tal moment de emergjence, lis filieris agroalimentârs – ancje se in soference – a son simpri restadis in vore. La stesse robe e à fat la filiere vitivinicule che aes “lidrîs” e à la ativitât dai vivârs e che in Friûl si fâs un vant de presince dai Vivârs Cooperatîfs di Raussêt (Vcr), la plui impuartante struture di produzion di risits dal mont. Tai prins 4 mês dal 2020, i Vcr a calcolin di vê vude une riduzion des venditis – rispiet aes previsions – di cirche il 15%, cun 2-3 milions di risits in mancul vendûts sul marcjât talian. La pandemie, par variis problematichis, e à sburtât un grum di roncârs di France, Cravuazie, Portugal e Spagne a disdî  i ordenatîfs. La stagjon dai implants si è incrosade cu la mancjance di lavoranzie, cu lis dificoltâts logjistichis di movimentazion de marcjanzie jenfri i diviers Paîs, e cun chês te gjestion des personis.
◆ I Vcr no àn vût problemis particolârs di consegne se no chei leâts al fat che, par cierts Paîs forescj, i presis di traspuart a son deventâts cuasi doplis. Ancje i vivariscj europeans a àn vivût i stes problemis parcè che tai 27 Paîs de Ue a son stâts 50-60 milions di risits no vendûts. In Italie, lis venditis a àn vude une ande regolâr in Meridion, là che i implants dai vignâi a son stâts fats ae fin dal Invier e sul tacâ de Vierte. Tal setentrion, invezit, si è regjistrade une diminuzion dai implants programâts, soredut tal Nord Ovest che al è stât une vore colpît de pandemie. Al è, dut câs, dut un setôr che nol mole, a disin tai Vcr, animâts di une grande passion e de convinzion che l’invistiment tai vignâi al è di considerâ simpri intune vision di tiermin medi o lunc. I vivariscj a àn metût jù i implants come di program ancje intune situazion di inciertece. La pandemie e sta di gnûf svicinant i consumadôrs al vin e ju sta orientant su prodots cun presits plui bas di une volte.
◆ La sierade dal Ho.re.ca. (il setôr dai hotel, dai ristorants, des cafetariis) e à causât un cuintricolp aes aziendis che a furnissin chel toc di marcjât; invezit a somein jessi plui favoridis chês che a fasin riferiment ae Grande Distribuzion Organizade, che e regjistre venditis simpri in cressite, e chês che a àn potenziât la vendite in rêt. Dut chest, contribuiraial a dissegnâ gnovis strategjiis pal vignâl dal avignî? Dificil dîlu cumò. Tant al dipendarà de durade de pandemie. Il 2020 al sarà un an dificil che al slungjarà lis sôs ombris ancje tal 2021 parcè che, cuasi dongje de prossime vendeme, lis aziendis si cjatin ancjemò cun tant vin te cantine, cuntun marcjât interni in grande dificoltât e un export in pratiche fer. Chest, al è clâr, nol sarà masse di stimul par cui che al voleve implantâ robe gnove. Ma i Vcr non si butin jù: a son simpri vierts e dongje dai produtôrs, no dome pe vendite dai risits, ma ancje pe assistence tecniche e pes consulencis, ancje se no son stadis dadis di persone. E a laran indevant su chest troi. ❚