La culture sostignibile dal pôl: Friûl-VJ prin in Italie

La nestre produzion e je otime, ma in regjon
e mancje une industrie pe prime lavorazion,
al dîs Cucchini, president
de Federazion regjonâl povocultôrs
Dai 7.500 etars di povoladis talianis certificadis daûr dai standards de Gjestion Forestâl des Plantisions (Gsp), 4.200 a son plantâts e coltivâts in Friûl-VJ (il 56%). Un primât assolût, erêt dal 2006, cuant che – ae avanvuardie in Italie – la regjon e à otignût la prime certificazion inte culture dal pôl. Numars e considerazions aprofondidis in ocasion des celebrazions dal Pefc Italia (il scheme di certificazion forestâl plui slargjât tal mont) pal so 20m complean che al à volût celebrâ tal viert cuntune serie di visitis tecnichis e cognossitivis che, pal Friûl-VJ, a àn tocjât propit lis povoladis certificadis. Aes visitis e à partecipât ancje Maria Cristina D’Orlando, vice presidente di Pefc Italia che e à sotlineât cemût che la Regjon Friûl-VJ e sedi stade tra i socis fondadôrs de Associazion Pefc Italia che, intal 2001, e à permetût la introduzion inte Penisule dal sisteme internazionâl di certificazion Pefc de Gsp.
◆ «La nestre Regjon e à crodût simpri, come nô, inte certificazion di sostignibilitât – al à dit Marco Cucchini, president de Federazion regjonâl dai povocultôrs dal F-VJ, in rapresentance dai cirche  300 socis –. E la sostignibilitât e je deventade il pont centrâl di aplicâ intal implant e inte culture des povoladis, ancje doprant lis sovenzions dal Psr. Graciis ancje ae reperibilitât di filiere, la povoculture regjonâl certificade e je passade, in 15 agns, di pôc plui di 1.000 etars ai atuâi 4.200: dute la produzion dal Friûl-VJ».
◆ «La plui part des povoladis regjonâls e je certificade e verificade daûr dal scheme di Pefc Italia – e zonte D’Orlando –. Un scheme in inzornament continui che al bute un voli aes esigjencis dai puartadôrs di interès e un altri aes gnovis diretivis europeanis contignudis intal Green Deal. Dopo tancj agns di sperimentazion, par esempli, a son daûr a testâ e a introdusi ben planc i gnûfs clons (une ventine) che a resistin al aiar (in graciis di un disvilup plui grant dal aparât radicâl e di plui flessibilitât dal fust), aes fitopatiis (MSA) e, duncje, di podê coltivâ cence il jutori dal za limitât numar di prodots chimics doprâts cumò».
◆ «Nassude tant che ativitât produtive al servizi des cjarteris – al conclût Cucchini – vuê la povoculture e je rivalutade in graciis de cuantitât enorme di anidride carboniche assorbide (fin a 25 toneladis al an par etar) e e siervìs soredut la industrie de prime lavorazion dal setôr len -mobilie (compensât). Il pôl furlan al è tant domandât (cualchidun al dîs che al è il miôr tal mont) stant che il so len al à un biel colôr blanc e al è une vore lizêr. Magari cussì no, però, o segnalìn che la filiere de trasformazion e je sbelançade a nestri disfavôr, stant che no son industriis di prime trasformazion operativis sul teritori regjonâl». ❚