Il Decret n. 350, dai 8 di Setembar dal 1999, al è stât un dai ultins ats firmâts di chel che al jere in chê volte il ministri des Politichis agriculis e forestâls, Paolo De Castro. Al veve il titul di “Regolament cun normis pe individuazion dai prodots tradizionâi”. Di chê volte, ogni Regjon e à proviodût a butâ jù, an par an, la sô Liste dai Prodots Agroalimentârs Tradizionâi (“Pat”), e cussì e à fat ancje la nestre. La prime Liste dai Pat e jere dal 2000 e e cjapave dentri 76 specialitâts (cuntune assence clamorose: il frico!). Intai agns, la liste si è slungjade e, cu la vincjesime prime revision publicade di resint, lis specialitâts dal Friûl-VJ a son ladis sù a 179 (dulà che la presince dal frico e je segnalade dôs voltis).
◆ Lis “bevandis analcolichis, distilâts e licôrs”, a son 7 (includût il most); lis “cjars frescjis e lis lôr preparazions” a son 44 (cun pestât e luianie); lis “cuincis” (asêt includût), 3; i “formadis”, 15 (latarie e formai dal cit, in cjâf); i “gras” (inevitabil l’ont), 3; i “prodots vegjetâi al stât naturâl o trasformâts” (Blave di Mortean e miluç Zeuka, su ducj), 48; lis “pastis frescjis e prodots dal for, biscotarie, scaletarie e confetarie” (sotlineant gubane e cjarsons), 20; i “prodots de gastronomie” (chi a slusicâ a son frico e jote), 8; lis “preparazions di pes, moluscs, crustacis e tecnichis particolârs di chei stes” (cun presints sardons in savôr e trute fumade di S. Denêl), 13; e i “prodots di origjin animâl” (cun mîls e scuetis in biele mostre), 18.
◆ La uniche gnove jentrade dal 2021 e je la ciespe di Cjistielgnûf. E je une varietât une vore antighe cun pome di forme ovâl slungjade di dimensions mediis (pês medi 30-40 g), cu la scusse slisse cuntune lizere infarinadure che e cuvierç la pome di colôr viole scûr. La polpe e je di colôr zâl naranç, di tiessidure e consistence medie. Il nusel al è piçul, elissoidâl slungjât, cun apiç puntît. La ciespe di Cjistielgnûf e je une vore dolce, sauride, di grande produtivitât. E madrès inte ultime decade di Avost e e à une buine resistence aes manipolazions. E conten lis vitaminis C e K e cualchi sâl minerâl, tant che il potassi e il magnesi. Cun di plui, e à otimis proprietâts antiossidantis e lassativis. La varietât e je presinte di tant timp intal teritori di Cjistielgnûf e si trate di un frutifar che nol à bisugne di nissun tratament. Al cres a une altitudin di 250-300 metris sul nivel dal mâr, massime su terens arzilôs, plens di siliç e di cuarç.
◆ Intai agns Cincuante, lis ciespis a vignivin racueltis e in part conferidis in cualchi centri di racuelte dal paîs. I comerciants lis cjamavin sui camions e lis rivendevin aes distilariis presintis di tant timp in regjon.
Dal Istât dal 2020, la “Susina di Castelnovo del Friuli”, o ben la “Ciespe di Cjistielgnûf”, e je une marche regjistrade de Associazion “Le rivendicules” di Cjistielgnûf; cumò, in graciis de consulence de Cjamare di Cumierç di Pordenon – Udin e dal Ersa, e je stade iscrite inte liste regjonâl dai Pat, dant sostance e continuitât al lavôr di difese za inviât di cualchi timp. ❚
